QSC-nin torpaqların rekultivasiyası departamenti müqavilə öhdəliklərinə layiqincə əməl etmişdir
Bakı, 10 avqust (AZƏRTAC). “Ekol Mühəndislik Xidmətləri” QSC-nin torpaqların rekultivasiyası departamenti (TRD) tərəfindən ötən illərdə ARDNŞ-in fəaliyyət sahələrində neftlə çirklənmiş 100 hektarlarla torpaq təmizlənmiş və həmin ərazilərdə landşaftın bərpası təmin olunmuşdur.
QSC-dən AZƏRTAC-a verilən məlumata görə, cari ildə TRD “Balaxanıneft” NQÇİ-nin 2-ci və 4-cü, Ə.Əmirov adına NQÇİ-nin 3-cü, H.Z.Tağıyev adına NQÇİ-nin 2-ci və 4-cü mədən ərazilərində, həmçinin Qaraçuxur iriləşmiş neft mədənləri ərazisində çirklənmiş torpaqların rekultivasiyası və bioremediasiyası layihələrini uğurla həyata keçirmişdir.
QSC-nin xüsusi texnika və nəqliyyat vasitələrilə layihə ərazilərindən bioremediasiya sahələrinə 129 min 663 kubmetr şlam daşınmış və həmin ərazilərə 165 min 264 kubmetr ştib, 297 min 845 kubmetr torpaq daşınaraq yayılmışdır. Bu müddətdə 78 hektardan çox sahə çirklənmədən təmizlənmişdir.
İlin 7 ayında TRD-nin 1-ci və 3-cü sahələri “Bibiheybətneft”, “Abşeronneft” və H.Z.Tağıyev adına NQÇİ-lərin landşaftı bərpa edilmiş layihə ərazilərində, eləcə də, ARDNŞ-in qaz emalı zavodunun sahələrində 104 min 980 ağac, bəzək və gül kollarına aqrotexniki xidmət göstərmişdir. Sahələr alaq otlarından təmizlənmiş, bitkilərin dibləri vaxtlı-vaxtında boşaldılmış, suvarılmış, gübrələrlə təmin edilmişdir. Həmin sahələrdə, xüsusilə yay mövsümündə bitkilərin mühafizəsi üçün kompleks tədbirlər həyata keçirilmişdir. Su təchizatının yaxşılaşdırılması üçün sahələrə 4 min metrədək yeni su xətti çəkilmişdir.
Bölmənin digər xəbərləri
