QUBA-XAÇMAZ BÖLGƏSİ ÇAYLARINDA ƏN YÜKSƏK SULULUQ MÜŞAHİDƏ OLUNUR
Bakı, 22 iyun (AZƏRTAC). Ekologiya və Təbii Sərvətlər Nazirliyinin Milli Hidrometeorologiya Departamentinin verdiyi məlumata görə, iyun ayının 20-dən 21-nə keçən gecə və səhər yağan leysan yağışları nəticəsində Balakən-Şəki, bölgəsinin Şinçay, Kişçay, Ağçay, Hamamçay, Kürmükçay, Əyriçay, Daşağılçay çaylarından qısamüddətli daşqın keçmişdir.
Gürcüstan ərazisində Qanıx çayının hövzəsinə yağan leysan yağışları nəticəsində, eyni zamanda, Balakən-Şəki bölgəsi çaylarından keçən daşqınlarla əlaqədar, son 6 gün ərzində Qanıx çayının Əyriçay məntəqəsində suyun səviyyəsi 21 santimetr artmışdır. Həmçinin, Gürcüstan ərazisində Kür çayının hövzəsinə yağan leysan yağışları nəticəsində, son 6 gün ərzində Kür çayının Qıraqkəsəmən məntəqəsində suyun səviyyəsi 52 santimetr artmışdır.
Hazırda ən yüksək sululuq Quba-Xaçmaz bölgəsi çaylarında və Balakən-Şəki bölgəsinin Kişçay çayında müşahidə olunur və ongünlük normanın 116-261 faizini təşkil edir. Digər çaylarda isə normaya yaxın və normadan aşağı sululuq müşahidə edilir.
İyunun 6-9-dan başlayaraq iyunun 22-dək Kür çayının Yevlax məntəqəsində suyun səviyyəsi 184, Zərdabda 132, Surrada 83, Şirvanda 77, Salyanda 80, Bankədə 38, Araz çayının Novruzlu məntəqəsində isə 117 santimetr azalmışdır.
Bölmənin digər xəbərləri
