Tbilisi, 30 yanvar, AZƏRTAC

Xalqımızın Ümummilli Lideri Heydər Əliyev hələ sovet dövründə Gürcüstanda yaşayan azərbaycanlılar haqqında düşünüb, onlara daim diqqət və qayğı göstərib. Soydaşlarımızın azad, firavan və xoşbəxt yaşamaları üçün müəyyən addımlar atıb.

Bu sözləri Gürcüstan parlamentinin sabiq deputatı, Gürcüstan Azərbaycanlıları Konqresinin təsisçisi və konqresin idarə heyətinin üzvü Ramiz Bəkirov AZƏRTAC-a Ulu Öndər haqqında xatirələrini bölüşərkən söyləyib.

R.Bəkirov deyib ki, Heydər Əliyevin Azərbaycanda hakimiyyətə qayıdışına Gürcüstanda da sevinənlər çox idi. “Biz onun necə böyük siyasətçi, dövlət xadimi olduğunu bilirdik. Düşünürdük ki, Azərbaycanımızı düşdüyü bəladan yalnız dərin dövlətçilik təcrübəsinə malik olan şəxs xilas edə bilər. Gürcüstanda Ulu Öndərlə görüşmək istəyən çox adam var idi. Mən də çox istəyirdim ki, onunla görüşüm, onun nə düşündüyünü, necə danışdığını bilim. Zaman keçdi və bu istəyim reallaşdı”, - deyə sabiq deputat bildirib.

Bakıda ali təhsil aldığı zaman teatra, tamaşalara böyük marağı olan R.Bəkirov 1976-cı ildə Azərbaycan Dövlət Dram Teatrında Mirzə İbrahimovun “Kəndçi qız” tamaşasına baxmağa gedib. Həmin dövrü xatırlayan müsahibimiz deyir: “Hələ tamaşa başlamamışdı. Birdən zala dərin sükut çökdü. İnsanlar ayağa qalxıb kimisə salamlayırdı. O adam, Heydər Əliyev idi. Ulu Öndər insanlarla gülə-gülə salamlaşdı, bəziləri ilə hal-əhval tutduqdan sonra qabaq sıralardakı yerlərdən birində əyləşdi. Tamaşa başladı və hamının diqqəti səhnəyə yönəldi. Tamaşa qurtardıqdan sonra tamaşaçıların alqış sədalarından qulaq tutulurdu. Heydər Əliyev aktyorlarla görüşdü. Yanımdakı insanlardan onun nə etdiyini, aktyorlara nə dediyini soruşdum. Orta yaşlı kişi mənə baxıb dedi ki, Heydər Əliyev teatr və kino sənətini çox sevir. O tamaşalara, kinolara baxmağı, aktyorlarla görüşməyi sevir. İndi də aktyorlarla yəqin ki, öz təəssüratlarını bölüşür, tövsiyələrini verir. Onun fikirləri teatr aktyorları, rejissorlar və yazıçılar üçün çox vacibdir”.

Daim ürəyində Heydər Əliyevlə görüşmək istəyi olan Ramiz Bəkirov sonunda bu arzusuna çatır.

Sovet İttifaqı dağıldıqdan sonra Gürcüstan da Azərbaycan kimi, öz dövlət müstəqilliyini bərpa etdi. O zaman siyasi proseslərdə fəal iştirak edən R.Bəkirov “Gürcüstan Vətəndaşlar İttifaqı”nın namizədi kimi, 1995-ci ildə Gürcüstan parlamentinin deputatı seçilir.

O dövrlərdə Azərbaycan Prezidentinin şəxsi nümayəndəsi kimi Şəmkir Rayon İcra Hakimiyyətinin başçısı Aslan Aslanov daim Gürcüstanda yaşayan soydaşlarla sıx əlaqə saxlayırdı. Gürcüstanda yaşayan soydaşlarımızın problemləri ilə maraqlanır, onların həllinə çalışırdı. Bir gün A.Aslanov R.Bəkirova və daha bir neçə fəal soydaşımıza Heydər Əliyevlə görüşəcəklərini bildirir.

Bu təklif R.Bəkirovun arzusuna çatması üçün ən böyük şans olur.

A.Aslanovun vasitəçiliyi ilə Gürcüstan parlamentinin ozamankı deputatları Ramiz Bəkirov, İsaq Novruzov və Hidayət Hüseynov, eləcə də, AzTV-nin Gürcüstan üzrə müxbiri Şahismayıl Məmmədov 1996-cı il yanvarın 6-da Bakıda Prezident İqamətgahında Heydər Əliyevlə görüşür. Bir saatdan çox çəkən görüşdə Heydər Əliyev onları diqqətlə dinləyir, qayğı və problemləri ilə maraqlanır.

Ulu Öndər Heydər Əliyev onlara deyir: “Siz Gürcüstanda yaşayan azərbaycanlılar, unutmayın ki, Gürcüstan sizin vətəniniz, sizin dövlətinizdir. Siz bu dövlətin qurulmasında, möhkəmlənməsində və inkişafında gürcü qardaşlarla çiyin-çiyinə çalışmalısınız. Sizin Gürcüstan parlamentinin deputatı seçilməyiniz məni çox sevindirir. Çalışın Gürcüstanda yaşayan azərbaycanlılar öz zəka və bacarıqları ilə hamıdan öndə olsunlar”.

Görüşdə Azərbaycan-Gürcüstan əlaqələrinin daha möhkəmləndirilməsi və inkişaf etdirilməsi məsələsi də diqqət mərkəzində olub. Heydər Əliyev bir sıra irimiqyaslı regional enerji layihələrindən danışıb. Ulu Öndər deyib ki, Azərbaycan neftinin Avropaya nəqli üçün bir sıra marşrutlar var. Lakin O, bu kəmərin Gürcüstandan keçməsini istəyir.

Sovet dövründə də Gürcüstanda yaşayan soydaşlarımız haqqında düşündüyünü və onlara müəyyən kömək etdiyini diqqətə çatdıran Heydər Əliyev deyib: “Onların bəzilərini Azərbaycanda yüksək vəzifələrə cəlb etmişəm. İndi də bu iri layihələr üzərində işləyirik. Çalışıram ki, Azərbaycan neftini Avropaya daşıyacaq kəmər Gürcüstandan keçsin. Gürcüstanda bizim yüz minlərlə soydaşımız var. Mən onların taleyinə biganə qala bilmərəm”.

Görüşdə Gürcüstanda Azərbaycan səfirliyinin açılması məsələsi də müzakirə olunub. Heydər Əliyev təyin olunacaq səfirin Gürcüstanı, soydaşlarımızın problemlərini yaxşı bilən adam olmasını istəyib və onlardan belə bir soydaşın olub-olmadığını soruşub.

Onlar da, bir nəfərin namizədliyini irəli sürüblər. Heydər Əliyev köməkçisinə həmin adamın adını qeyd etməyi tapşırır və bir müddət sonra səfir təyin olunur.

R.Bəkirovun sözlərinə görə, nümayəndə heyətinin üzvləri soydaşlarımız adından Heydər Əliyevi Gürcüstana dəvət edirlər.

Heydər Əliyev belə bir dəvəti yaxın dostu Eduard Şevardnadzedən də aldığını bildirir və 1996-cı il martın 8-9-da Ulu Öndərin Gürcüstana səfəri baş tutur.

R.Bəkirovun sözlərinə görə, bu səfər çox uğurlu, Gürcüstan azərbaycanlıları üçün mühüm əhəmiyyət kəsb edən tarixi bir səfər olub. Səfərin ən yaddaqalan və əhəmiyyət kəsb edən hissəsi soydaşlarımızla bağlı olub.

Belə ki, Z.Poliaşvili adına Gürcüstan Akademik Dövlət Dram Teatrında Prezident Heydər Əliyevlə soydaşlarımızın görüşü təşkil edilib. Gürcüstan Prezidenti Edurd Şevardnadze çıxışı zamanı bu ölkədə yaşayan azərbaycanlıları diaspor adlandırıb. Bu isə Heydər Əliyevin etirazına səbəb olub. Ulu Öndər elə yerindəcə bu ifadəyə öz etirazını bildirir və deyir: “Gürcüstanda yaşayan azərbaycanlılar diaspor deyil. Onlar, aborigen xalqdır. Ona görə də onları diaspor adlandırmaq düzgün deyil. Onlar bizim soydaşlarımızdırlar”.

E.Şevardnadze diaspor ifadəsini sadəcə olaraq dilinə yaxşı yatdığı üçün işlətdiyini bildirir və Ulu Öndərlə razılaşır.

Xalqımızın Ümummilli Lideri Heydər Əliyev soydaşlarımıza müraciətində deyib: “Gürcüstanda yaşayan azərbaycanlılar! Sizin ulu babalarınız, Azərbaycan və gürcü xalqları yadellilərə qarşı birgə mübarizə aparıblar. Öz torpaqlarını müdafiə ediblər. Bu dostluq bu gün də davam edir. Ona görə də əziz bacılar, qardaşlar, bu, sizin doğma vətəninizdir, bu, sizin doğma torpaqlarınızdır. Siz öz doğma vətəninizdə, torpaqlarınızda yaşayırsınız”.

Bu çıxışı Ulu Öndərin millətinə, xalqına yüksək sevgisinin təzahürü adlandıran R.Bəkirov deyir ki, bu çıxış, həmçinin bizim öz Vətənimizdə ayaq üstə durmağımıza bir çağırış idi. Biz gürcüstanlılar hər zaman Ulu Öndərin bu ağsaqqal mövqeyini minnətdarlıq hissi ilə xatırlayırıq.

Sabiq deputat deyir ki, Ümummilli Lider Heydər Əliyev fenomen yaddaşa malik idi: “Heydər Əliyev bir dəfə Gürcüstanda Eduard Şevardnadzenin iqamətgahında olarkən dəyirmi masa arxasında onunla görüşənlərin - bizim hər birimizin adlarını sadaladı. Onunla görüşdən bir iki epizod da danışdı. Eduard Şevardnadze həmin tədbirdə Azərbaycan neftinin Gürcüstan ərazisindən keçməklə Avropaya nəqlinə icazə verdiyi üçün Heydər Əliyevə bir daha dərin minnətdarlıq etdi. Heydər Əliyev isə qarşıda hələ daha böyük layihələrin olduğunu bildirdi”.

R.Bəkirov 2001-ci ildə Dünya Azərbaycanlılarının I qurultayındakı iştirakı zamanı Ulu Öndərin çıxışını xatırlayaraq deyib: “Heydər Əliyev çıxış edərək dünya azərbaycanlılarını həmrəyliyə, birliyə, milli-mənəvi dəyərlərimizi qoruyub saxlamağa və inkişaf etdirməyə, Ana dilimizi mükəmməl öyrənməyə çağırdı. Bu çağırış həqiqətən də dünya azərbaycanlılarının birliyində mühüm əhəmiyyət kəsb etdi. Ulu Öndər istəyirdi ki, azərbaycanlılar hansı ölkələrdə işləyirlərsə, o ölkələrdə istədikləri kimi azad yaşasınlar, lakin öz milli mənsubiyyətlərini heç zaman unutmasınlar”.

Müsahibim deyir ki, Azərbaycan xalqı xoşbəxt xalqlardandır. Onun Ulu Öndəri, dünyaşöhrətli tarixi şəxsiyyəti və bu tarixi şəxsiyyətin siyasi kursunu uğurla davam etdirən, ideyalarını yaşadan, həyata keçirən İlham Əliyev kimi praqmatik Prezidenti var. Bu gün Azərbaycan xalqı və dünya azərbaycanlıları, eləcə də Gürcüstanda yaşayan azərbaycanlılar tarixi vətənləri Azərbaycanın, onun Prezidenti, Müzəffər Ali Baş Komandanı İlham Əliyevin ətrafında sıx birləşiblər. Bu birlik əbədidir, ölməzdir və heç zaman qırılmayacaq tellərlə bağlıdır.

Xətayi Əzizov

AZƏRTAC-ın xüsusi müxbiri

Tbilisi