Rəsmi Pekin ABŞ Prezidentinin iddialarını təkzib edib
Bakı, 22 aprel, AZƏRTAC
Çərşənbə günü Pekin ABŞ Prezidenti Donald Trampın Amerika qüvvələri tərəfindən ələ keçirilən İran gəmisinin “Çindən hədiyyə” daşıya biləcəyi ilə bağlı iddialarını rədd edib.
AZƏRTAC Sinxua agentliyinə istinadla xəbər verir ki, Çin Xarici İşlər Nazirliyinin sözçüsü Quo Ciakun Pekində jurnalistlərə bildirib: “Çin mövqeyini dəfələrlə açıq şəkildə bildirib. Bir daha qeyd edim ki, məsuliyyətli böyük bir ölkə olaraq, Çin həmişə beynəlxalq öhdəliklərini yerinə yetirməkdə nümunə olub”.
Donald Tramp aprelin 21-də iddia edib ki, bazar günü ABŞ qüvvələri tərəfindən Hörmüz boğazında blokadaya tabe olmaqdan imtina etdikdən sonra ələ keçirilən İran bayrağı altında üzən “TOUSKA” yük gəmisi “Çindən hədiyyə” daşıyırmış.
ABŞ Mərkəzi Komandanlığı qeyd edib ki, ələ keçirilən gəmi Amerika donanmasının nəzarətində qalır.
Vaşinqton və Tehranın yüksəkvəzifəli şəxsləri Pakistanın paytaxtı İslamabadda görüşdükdən sonra ABŞ ötən həftə əsas su yolunu blokadaya alıb. Gərginlik Trampın çərşənbə günü başa çatması planlaşdırılan ikihəftəlik atəşkəsi yeni bir müddət vermədən birtərəfli şəkildə uzatması ilə davam edir.
Bölmənin digər xəbərləri
