Riqada Xocalı soyqırımı qurbanlarının xatirəsi anılmışdır
Riqa, 28 fevral (AZƏRTAC). Riqada Xocalı faciəsinin 20-ci ildönümü ilə bağlı tədbir keçirilmişdir. Tədbirdə Milli Məclisin deputatları Fuad Muradov və Sahibə Qafarova, Diasporla İş üzrə Dövlət Komitəsinin Avropa şöbəsinin müdiri İlham Məmmədov, Avropa parlamentinin Latviyadan olan deputatı Aleksandr Mirski, Latviya Seyminin Latviya-Azərbaycan Parlamentlərarası Əməkdaşlıq Qrupunun rəhbəri Aleksandr Sakovski, Azərbaycanın Latviyadakı səfirliyinin əməkdaşları, Azərbaycan diasporunun nümayəndələri iştirak etmişlər.
Tədbir iştirakçıları Xocalı soyqırımı qurbanlarının xatirəsini bir dəqiqəlik sükutla anmışlar.
Tədbirdə Latviyanın “Ocaq” Azərbaycan Mədəniyyəti Mərkəzi gənclər bölməsinin yaradıcı qrupunun gücü ilə Xocalı soyqırımının 20-ci ildönümü ilə əlaqədar “Biz Xocalı uşaqlarıyıq: doğulmamış körpələrin harayı” adlı tamaşa göstərilmişdir.
Riqa Klassik Gimnaziyasının səhnəsindən vəhşicəsinə qətlə yetirilmiş xocalılıların 20 yaşında ola biləcək, doğulmamış körpələrinin adından deyilən sözlər salondakılara çağırış kimi səslənildi. Bu səslər bütün bu illər ərzində Azərbaycan xalqının soyqırımına göz yummağa çalışan hər kəsə qınaq kimi səslənildi. Belə bir hiss yaranmışdı ki, 220 nəfərlik salonda hamı sanki nəfəsini içinə çəkmişdi. Ağır sükutu Xocalı müsibətlərindən danışan aparıcı Rüstəm Mustafayevin səsi pozurdu.
Latviya Respublikasının Prezidenti yanında Milli Azlıqların İşləri üzrə Məsləhət Şurasının sədri Roman Əliyev çıxışında demişdir: “Kimdir günahkar?” sualının cavabını biz hamımız bilirik, lakin biz Xocalıya ədalət naminə hər şey etməliyik ki, başqaları da - həmkarlarımız, tələbə yoldaşlarımız, dostlarımız, qonşularımız, Latviya xalqı bundan xəbərdar olsunlar. Heydər Əliyev Fondunun vitse-prezidenti Leyla Əliyevanın təşəbbüsü olan bu aksiyadan hamı xəbərdar olmalı və ədalətə səs verməlidir. Bu, bizim borcumuzdur!”
Avropa Parlamentinin Latviyadan olan deputatı Aleksandr Mirski demişdir: “Mən sizin ağrı-acınızı bölüşürəm. Lakin siz ona görə güclüsünüz ki, Vətəniniz Azərbaycan bu gün Avropada böyük nüfuz sahibi olan qüdrətli ölkədir. Azərbaycan nə qədər qüdrətlidirsə, işğal edilmiş ərazi məsələsinin ədalətli həlli, danışıqlar prosesində Azərbaycanın uğurları üçün imkanlar bir o qədər genişdir. Mən Avropa Parlamentində Azərbaycana dəstək qrupunun üzvüyəm. Odur ki, qrupun rəhbərinə, Bolqarıstandan olan deputat Y. Kirillova da kömək edəcəyim ki, bu ağır məsələlər həll edilsin”. A. Mirski vurğulamışdır ki, Azərbaycan dövlətinin başçısı İlham Əliyev çox güclü liderdir, danışıqların nəticə verməsi üçün böyük səylər göstərir, lakin Ermənistan rəhbərlərinin də buna əməl etmələri lazımdır. Avropa bu gün Azərbaycanla sıx əlaqələrin inkişafında çox maraqlıdır.
Aleksandr Sakovski çıxışında demişdir: ”Bu dəhşətli sənədli dəlil-sübutları görəndə şok keçirirsən, əzab çəkirsən və sizin ağrı-acınız bizim ağrı-acımıza çevrilir. Dəhşətə gəlirsən! ” A. Sakovski diqqəti belə bir məsələyə cəlb etmişdir ki, “Ocağ”ın rəhbəri Roman Əliyevin dediyi ədaləti bərpa etmək üçün əməli işlər görülməlidir. O demişdir: ”Biz bunu etməliyik. Belə vəhşi aksiyalardan sonra, Azərbaycan xalqının yaşadığı bütün müsibətlərdən sonra bu gün Azərbaycan güclü iqtisadiyyatı olan müasir dövlətə, regionun iqtisadi və mədəni mərkəzinə çevrilmişdir ki, bu da, zənnimcə, çox yaxşı bir haldır”. O vurğulamışdır ki, Azərbaycan Prezidenti əsl strateqdir, təkcə Qafqazda deyil, həm də bütün Avropa məkanında qarşıya yeni inkişaf vəzifələri qoyur, münasibətlərimiz möhkəmlənir və inkişaf edir, Latviya Respublikası bu strategiyanı dəstəkləyir.
Seymin deputatı demişdir: ”Latviya Azərbaycanla iqtisadi əməkdaşlığın inkişafında maraqlıdır. Sizin səyləriniz, belə tədbirlər sayəsində Xocalı haqqında, Qarabağ haqqında həqiqətləri getdikcə daha çox deputat, dövlət işçisi və sadə adamlar öyrənirlər”.
Milli Məclisin deputatı Fuad Muradov öz çıxışında bildirmişdir ki, bu gün müxtəlif ölkələrin parlamentlərində Azərbaycanın ədalətli tələblərini öyrənir, bəzi ölkələrin parlamentləri Xocalı soyqırımını artıq tanıyır. Bu yaxınlarda ABŞ-ın bəzi ştatları azərbaycanlıların 20 il əvvəl törədilmiş soyqırımını tanımışlar. F. Muradov demişdir: “Dostlarımız - Latviya deputatları düzgün qeyd etdilər ki, biz getdikcə daha da güclənirik. Bizi bir çox ölkələrdə dəstəkləyirlər. Brüsseldəki deputatlarımız fəal işləyirlər, Avropa deputatları ilə əməkdaşlığımız genişlənir. Diasporumuz getdikcə daha güclü və fəal olur”.
Öz çıxışına “Bu gün burada böyük ürək ağrısı ilə çıxış edirəm” sözləri ilə başlayan Milli Məclisin deputatı Sahibə Qafarova demişdir: “Azərbaycan xalqının 20 il əvvəl məruz qaldığı soyqırımı biz azərbaycanlılar üçün tarixə çevrilməmişdir və əsla keçmişdə qala bilməz. Ağrı-acımız daim bizimlədir”. S. Qafarova demişdir ki, Xocalı xatirə gününün bu gözəl gimnaziyada keçirilməsi, onun gənclər tərəfindən təşkil edilməsi rəmzi haldır. Bu o deməkdir ki, uşaqlarımız da unutmamışlar, onlar Azərbaycanın vətənpərvərləridirlər və soyqırımın heç vaxt və heç yerdə təkrarlanmaması üçün burada öz latviyalı dostları ilə birlikdə ədaləti dəstəkləyəcəklər.
“Azəri” Cəmiyyətinin idarə heyətinin sədri Ulduzxan Əhmədova Azərbaycan tarixinin bu ağır günündə bizim yanımızda olduqlarına görə deputatlara minnətdarlığını bildirmişdir.
Diasporla İş üzrə Dövlət Komitəsinin Avropa departamentinin rəisi İlham Məmmədov Azərbaycan diasporunun Latviya Seymi, azərbaycanlıların təşkil etdikləri tədbir və aksiyalarda həmişə iştirak edən elm və mədəniyyət xadimləri ilə əməkdaşlığının böyük rolunu vurğulayaraq demişdir: “Xocalı soyqırımı təkcə qonşularımızın təcavüzünün deyil, həm də vəhşiliyinin, çox təəssüf ki indiyədək davam edən misli görünməmiş barbarlığının təcəssümüdür. Hələ də əsgərlərimiz və hətta uşaqlarımız erməni cəlladlarının yeni nəslinin əlindən tələf olur. Bax, buna görə sizin işiniz olduqca vacibdir, çünki o da həqiqət anını, Xocalıya ədalət anını yaxınlaşdırır”.
N. Hüseynova
AZƏRTAC-ın xüsusi müxbiri
Riqa
Bölmənin digər xəbərləri
