Bakı, 15 fevral (AZƏRTAC). Ermənistanın Armenianreport.com informasiya portalında dərc olunmuş bir materialda (http://www.armenianreport.com/pubs/52453) prezident Serj Sarkisyan tənqid edilir.

İnformasiya resursu Rusiyanın “Rossiya-24” dövlət telekanalını da kəskin tənqid etmişdir. Buna səbəb - həmin telekanalın Ermənistan prezidentinin ailəsinə həsr etdiyi, baş qəhrəmanı Ermənistanın birinci xanımı Rita Sarkisyan olan filmdir.

““Rossiya-24” telekanalından piar-yalan: asan yolla pul qazanmaq və gülmək” sərlövhəli məqalənin müəllifi Qraçya Qalustyan Rusiya telekanalı jurnalistlərinin “xalturaya” yol verməsinə , “Prezidentin arvadı” filminin ssenarisinin və montajının keyfiyyətsiz olmasını qeyd edir.

AZƏRTAC həmin məqalənin tam mətnini oxuculara təqdim edir.

“Rita Aleksandrovna barəsində bunu bilmək “Rossiya-24” telekanalının bütün auditoriyasına nə dərəcədə vacibdir ki, Serj Azatoviç ilə görüşənə qədər heç kəs ona 3-dən artıq qərənfil hədiyyə etməmişdir?!

Çox güman ki, “Rossiya-24” telekanalında nümayiş etdirilmiş “Prezidentin arvadı” filminə görə külli məbləğdə pul qazananlar Ermənistan prezidenti Serj Sarkisyanın piar kampaniyası adı altında onu xamladıqlarına görə gülməkdən uğunmuşlar. Doğrudan da gülməlidir. Axı, Ermənistanın birinci xanımı Rita Aleksandrovna Sarkisyan və kadr arxasındakı səsin müəllifi “Kamedi klab” verilişinin bir neçə buraxılışı üçün kifayət edəcək gülməli sözlər danışırlar.

Əvvələn, bu filmin hansı auditoriyaya ünvanlanması aydın deyil. Əgər auditoriya kimi Ermənistan və Qarabağ vətəndaşları nəzərdə tutulursa, bunun üçün bir ətək xərc çəkməyə dəyməzdi. Burada prezident və onun ailəsi barədə demək olar ki, hər şeyi kinosuz da bilirlər. Belə çıxır ki, film kənar auditoriya üçün nəzərdə tutulmuşdur. Yenə aydın deyil. Axı nə qədər gülməli olsa da, xatırlatmalıyıq ki, prezident seçkilərində xalturaçıların əsərinə federal telekanalda baxmış Rusiyanın və ya dünyanın başqa bir ölkəsinin vətəndaşları yox, Ermənistan vətəndaşları səs verəcəklər. Deməli, bütün bu əməliyyat həmin layihənin həyata keçirilməsində iştirak etmiş bir qrup şəxsin maliyyə vəziyyətini əhəmiyyətli dərəcədə yaxşılaşdırmaq üçün lazım imiş.

Rusiya televiziya işçilərinin yaradıcılığının və onların yumor hissinin məhsuluna baxanlar isə indi Ermənistanı idarə edənlərin intellektual və mədəni səviyyəsi barədə birmənalı nəticə çıxara bilərlər. Tamaşaçıların gülüş səsləri indi də eşidilir. Etiraf etməliyik: gülməli olana gülmək qəbahət deyil. Bu “şedevr”in nümayişinin ilk dəqiqələrindən tamaşaçı gülməkdən özünü saxlaya bilmir.

Məsələn, bir epizodda Ermənistan prezidenti Serj Sarkisyan pilləkənlə düşür. Əynində palto, əlində portfel var. Onu dövlət əhəmiyyətli işlər gözləyir. Lakin əvvəlcə dövlət başçısının səhər yeməyi vaxtı çox xoşladığı almalı fəsəli göstərilir. Mühüm məlumatdır, deyilmi? Belə çıxır ki, əgər bizə Serj Sarkisyanın səhərlər manna sıyığı və ya qayğanaq yediyini desəydilər, tamam məyus olardıq. Hərçənd, ölkə prezidentinin həyatında fəsəlinin rolu barədə giriş sözünün mənası sonrakı epizodlarda daha geniş açıqlanır. Sən demə, Vladimir Putin və Dmitri Medvedev də Serj Sarkisyan kimi, fəsəli yeməyi xoşlayırlarmış. Bir halda ki, belədir, onda ölkənin bütün sakinləri çoxluca fəsəli bişirsinlər, bəlkə onda Rusiya prezidenti axır ki, Ermənistana səfər edər. Eyni zamanda politoloji leksikona yeni bir termin əlavə edək - “fəsəli diplomatiyası”.

Sonra Serj Sarkisyanın çox əməksevər olmasından bəhs edilir. O, ən yaxşı halda axşam saat 10-da evə qayıdır. Burada iki sual yaranır. Birinci: kim deyir ki, cənab prezidentin axşam evə gec qayıtması hökmən onun işdə çox məşğul olması ilə bağlıdır. Bəlkə o, şahmat oynayırmış? Axı hamıya məlumdur ki, o, bu işi xoşlayır...

İkinci sual: əgər Ermənistan prezidenti, bizə bildirildiyi kimi, heyrətamiz dərəcədə əməksevərdirsə, onda nə üçün ölkəmizin vətəndaşlarının güzəranı get-gedə pisləşir, ölkədən çıxıb gedənlərin sayı isə artır. Bizim dövlət başçısının adı, gərək ki, Sizif deyil, amma işinin faydalı iş əmsalı eynidir.

Serj Azatoviç ilə Rita Aleksandrovnanın necə tanış olması barədə hekayəti ayrıca xatırlatmağa dəyər. Prezident ailəsinin dostu Nelli Voskanyan bu barədə bütün Rusiyada və keçmiş SSRİ məkanındakı başqa ölkələrdə dəfələrlə çıxış etmişdir. Televiziya tamaşaçılarına söyləyirlər ki, Rita Aleksandrovna Nelli Voskanyanın oğlunun musiqi müəlliməsi olmuşdur. Oğlanın 6 yaşı tamam olanda Nelli-can həmin bayrama Rita Aleksandrovnanı və ... Stepanakert şəhər komsomol komitəsinin üzvlərini, o cümlədən komsomolçu kimi inamla karyera yaratmış Serj Azatoviçi də dəvət edir. Nə üçün təəccüblənirsiniz? Axı uşağın altı yaşına komsomol işçilərini dəvət etmək tamamilə məntiqəuyğundur! Sadəcə olaraq, bütün bu deyilənləri Serj Azatoviçin və ya Rita Aleksandrovnanın ad gününə Vitalik Voskanyanın bütün dostlarının dəvət edilməsi barədə hekayətlə tamamlamaq lazım idi.

Yeri gəlmişkən, Vitalik haqqında. Veriliş müəlliflərinin fikrincə, Serj Sarkisyan Stepanakert şəhər komsomol komitəsinin işçisinin uşağından çox ustalıqla - Serj Azatoviçlə Rita Aleksandrovna arasında görüşlər üçün bəhanə kimi istifadə edirmiş. Tamaşaçılara bildirilir ki, Ermənistanın gələcək prezidenti o vaxt Vitaliki musiqi məşğələlərinə aparmağı qərara almaqla siyasətçilərin təbirincə desək, “məkik diplomatiyası”nı sınaqdan keçirmişdir. Sonra isə indi artıq polkovnik rütbəsi olan Vitalik Voskanyanın özünü göstərirlər. Yenə sual yaranır: prezident ailəsinin həyatında bu qədər mühüm rol oynamış insan daha yüksək rütbəyə layiq deyilmi?

Bu suala cavab verməkdə tələsməmək olar, xüsusən ona görə ki, ondan daha vacib sual var: “Rossiya-24” telekanalının bütün auditoriyasının bunu bilməsi nə dərəcədə vacibdir ki, Rita Aleksandrovna Serj Azatoviçlə görüşənə qədər ona heç kəs üçdən çox qərənfil bağışlamamışdı?! Yaxud, R.Sarkisyan deyir: “Həyatımda ilk dəfə 25 qərənfil aldım. Yəqin ki, bu, mənim gözlədiyim adam idi”. Belə çıxır ki, o hələ də şübhələnir - Serj Azatoviç doğrudanmı onun ərə getməli olduğu adamdır, yoxsa o deyil? Maraqlıdır, görəsən, bir başqası Rita Aleksandrovnaya 25 yox, 35 qərənfil bağışlasaydı, o nə edərdi? Onda Serj Azatoviç Rita Aleksandrovnasız qalardı?! Bunlar mənim suallarım deyil. Bircə dəqiqə, bu suallar Ermənistanın birinci xanımının söylədiklərindən məntiqi nəticə kimi yaranır!

Yaxşı, deyək ki, o, yersiz bir söz demişdi, bəs “Rossiya-24” telekanalının film üzərində işləyən redaktorlar qrupunun həmin məqamı kəsib atmasına nə mane olurdu? Buna heç kəs mane olmurdu, amma kəsib atmayıblar. Özü də təkcə bu hissəni yox. Ermənistanın birinci xanımı onlar nikah haqqında şəhadətnaməni imzalayan vaxtda çəkilmiş fotoşəkili göstərərək deyir: “Bu elə bir möhürdür ki, ondan yaxa qurtarmaq artıq mümkün deyil”. Bu cümlədə ilk növbədə yadda qalan nədir? - “Yaxa qurtarmaq” sözü. Bu sözü kəsib atmaq çətin idimi? Rita Aleksandrovnanın öz xasiyyəti barədə dediyi “partlayış təhlükəli” sözünün efirə getməsi vacib idimi? Bu üsulla birinci ledinin hansı obrazı formalaşdırılır? Özünüz düşünün.

Növbəti kadr. Nikolay Sərdaryan - tənəkəçi və Serj Sarkisyanın uşaqlıq dostu. Rusiyalılar şokdadır. Nikolay Sərdaryan əvvəlcə nəçi olmuşdu: tənəkəçi, yoxsa gələcək prezidentin dostu? Daha sonra -Ermənistanın bütün əvvəlki prezidentlərinin tənəkəçi dostları olmuşdurmu və Ermənistandakı bütün tənəkəçilərin, o cümlədən ölkəmizin hüdudlarından kənarda, prezidentlər arasında dostları varmı? Kolya Sərdaryanın bir frazası necə də təntənəli səslənir: səliqə ilə elçi getdik!

Bu cümlələr isə tamaşaçını ələ salmaqdır: “Bütün dünya bilir ki, ermənilərin çox yaxşı geyim zövqü var. İstənilən ölkənin paytaxtında ermənini ayaqqabılarının parıltısına və gözəl kostyumuna görə tanımaq olar”. Belə çıxır ki, əgər bizlərdən kiminsə əynində qəşəng kostyum, ayağında par-par parıldayan tufli yoxdursa, onlar erməni deyil?! Ermənistan prezidentinin uşaq vaxtı maymaq pioner olduğu dövrü nümayiş etdirmək nəyə lazım idi? Onu uzunsaçlı stilyaqa obrazında göstərmək nəyə lazım idi? Nelli Voskanyan bu filmdə nə üçün bildirir ki, əgər Serj Azatoviç Yurmalaya getməsəydi, o (Voskanyan) elə həmişə nimdaş başmaq geyinməli olacaqdı?!

Nəhayət, əsas məsələ: kim deyir ki, bütün bu hekayətlər prezidentin ailəsi haqqında, bütövlükdə Ermənistan haqqında müsbət fikir formalaşdırır?! Sizə yalan satıblar, Serj Azatoviç və Rita Aleksandrovna. Hərçənd, indi artıq nə isə etmək gecdir. Hər şey hamıya aydın oldu”.