Rotterdamda Azərbaycanın Zəfər bayramı təntənəli şəkildə qeyd edilib
Rotterdam, 31 oktyabr, AZƏRTAC
Niderland Krallığının Rotterdam şəhərində fəaliyyət göstərən Benilüks Azərbaycanlıları Konqresinin (BAK) təşkilatçılığı ilə “Qarabağ” idman klubunun ofisində 44 günlük Vətən müharibəsində qazanılan şanlı Qələbəyə həsr edilmiş təntənəli tədbir keçirilib.
AZƏRTAC xəbər verir ki, tədbirin əvvəlində Vətən torpaqları uğrunda canlarını qurban vermiş Azərbaycanın oğul və qızlarının xatirəsi bir dəqiqəlik sükutla yad edilib, Dövlət Himni səsləndirilib. Azərbaycan Prezidenti İlham Əliyevin rəhbərliyi ilə rəşadətli Ordumuzun Vətən müharibəsində əldə etdiyi şanlı Zəfərə həsr edilmiş film nümayiş olunub.
BAK-ın sədri Elsevər Məmmədov çıxış edərək, Vətən müharibəsində qəhrəman Azərbaycan oğullarının rəşadətindən söz açıb. O, qardaş Türkiyənin milli bayramı münasibətilə də BAK üzvlərinin təbriklərini səsləndirib.
Azərbaycan səfirliyinin Niderlanddakı konsulu Səbinə Sadıqlı çıxış edərək Ordumuzun şücaətindən danışıb, Niderland Krallığında yaşayan soydaşlarımızı Zəfər bayramı münasibətilə təbrik edib.
Tədbirdə Haarlem şəhərində fəaliyyət göstərən “Körpə fidanlar” uşaq musiqili teatr qrupunun fəaliyyəti təqdim edilib. Qrupun kiçik üzvlərinin iştirakı ilə rəşadətli Ordumuza və Zəfər bayramına dair şerlər səsləndirilib, musiqilər ifa edilib.
Səfirliyin konsulu Səbinə Sadıqlı, BAK sədrinin müavini Sima Cəfərova və “Ana Vətən” Avropa Azərbaycanlı Qadınlar Assosiasiyasının sədri Mayisə Ağamirzəyeva “Körpə fidanlar” qrupunun kiçik üzvlərinə Zəfər bayramı münasibətilə və onları daha da motivasiya etmək məqsədilə hədiyyələr təqdim ediblər.
Həmçinin 11 yaşlı Nisə Mirzəzadə rəssamı olduğu və Niderlandda nəşr edilmiş “Het geheim van Karabakh”( Qarabağın sirri) adlı kitabı BAK-a təqdim edib.
Zəfər bayramına həsr edilmiş tədbir BAK Ağsaqqallar Şurasının rəhbəri İlham Babayevin (Kamança), eləcə də bu ölkədə fəaliyyət göstərən “Odlar Yurdu” Assosiasiyasının üzvləri Firəngiz Bağırova və Nemətağa Əliyevin ifasında Azərbaycan xalq mahnılarının və dünya bəstəkarlarının musiqilərinin səsləndirilməsi ilə davam edib.
Qeyd edilib ki, xalqımız Zəfər bayramını həsrətlə gözləyirdi. Otuz ildir ki, Qarabağ həsrəti hər kəsi üzürdü. Şəhidlərimiz bu Zəfəri qanları bahasına Azərbaycan xalqına yaşatdı.
Qırx dörd günlük Vətən müharibəsində torpaqlarımız uğrunda canlarını qurban vermiş şəhidlərimizin əziz xatirəsi bir daha yad edilib. Tədbir “Yaşasın, Azərbaycan Ordusu!”, “Yaşasın qalib Azərbaycan xalqı!” şüarları ilə başa çatıb.
Şəhla Ağalarova
AZƏRTAC-ın xüsusi müxbiri
Rotterdam
Bölmənin digər xəbərləri
