RUSİYA ALİMİ NOBEL MÜKAFATINA BƏRABƏR MÜKAFATDAN İMTİNA ETDİ
Bütün dünya riyaziyyatçılarının 1904-cü ildən bəri baş sındırdıqları Puankare hipotezasını Perelman hələ 2002-ci ildə isbat etmişdi. Bu hipotezanı izah etmək, əslində, qeyri-mümkündür, onu Kembricdəki Kleya Riyaziyyat İnstitutu (ABŞ) minilliyin həll olunmamış ən mühüm riyazi məsələləri sırasına daxil etmişdi.
Perelman 1966-cı il iyunun 13-də Leninqradda qulluqçu ailəsində doğulmuşdur. 1982-ci ildə Budapeştdə Beynəlxalq riyaziyyat olimpiadasında qalib gəlmişdir. Leninqrad Dövlət Universitetinin riyaziyyat-mexanika fakültəsinə imtahansız qəbul edilən Perelman Lenin təqaüdü alırdı. Universiteti və aspiranturanı bitirdikdən sonra Moskvadakı V.Steklov adına Riyaziyyat İnstitutunun Sankt-Peterburq şöbəsində, 1980-ci illərin axırlarından ABŞ-ın müxtəlif universitetlərində işləmişdir. Bu yaxınlaradək Steklov adına institutda çalışırdı.
Qriqori Perelman elmi dairələrdə şöhrətpərəstlikdən uzaq təmənnasız bir adam kimi tanınır. Alim ona doktorluq elmi dərəcəsi verilməsindən, vəzifədə irəli çəkilməsindən imtina etmişdir. 1996-cı ildə Avropa Riyaziyyatçılar Konqresinin təsis etdiyi mükafatın təqdim olunması mərasiminə getməmişdir.
Puankare hipotezasının isbatına görə o, hələ 2002-ci ildə Kleya Riyaziyyat İnstitutunun mükafatını ala bilərdi. Lakin elm dünyasında mövcud qaydaya görə, yeni hipotezalar ixtisaslaşdırılmış jurnalda dərc edilməli idi. Təxminən dörd il ərzində Perelman materialları ancaq internetdə yerləşdirməklə kifayətlənmişdir.
Bir sözlə, onu şəxsi mənafe, müxtəlif mükafatlar, böyük məbləğdə pul-para deyil, ilk növbədə, elmin tərəqqisi maraqlandırır və alim ancaq bu amalla yaşayır.
Bölmənin digər xəbərləri
