İQTİSADİYYAT
RUSİYA ENERGETİKLƏRİ BAKIYA GƏLMİŞLƏR
“Azərenerji” Səhmdar Cəmiyyətinin mətbuat xidmətindən AZƏRTAC-a bildirmişlər ki, “Rusiyanın vahid enerji sistemləri” (Rusiyanın VES) Rusiya Səhmdar Cəmiyyətinin (RSC) Bakıya gəlmiş nümayəndə heyəti enerji ixracının artırılmasının mümkünlüyü və Rusiya elektrik enerjisinin ölkəmizdən tranzit yolla İrana və Gürcüstana ötürülməsi məsələlərini Azərbaycan energetikləri ilə müzakirə edəcəkdir. Nümayəndə heyətinə RSC İxrac departamentinin, “Enerjişəbəkəlayihə” və “Daqenerqo” səhmdar cəmiyyətlərinin nümayəndələri daxildirlər.
Müzakirələr zamanı yüksək gərginlikli Dərbənd-Yaşma xəttinin 330 kilovoltluq ikinci hissəsinin layihələşdirilməsi və tikintisi, habelə qəzaya qarşı avtomat qurğular sistemi kompleksinin işə salınması məsələlərinə xüsusi diqqət yetiriləcəkdir. Ölkələrimizin enerji sistemlərinin səmərəli idarə edilməsinə və sabit enerji mübadiləsinin təminatına xidmət edən distpetçer mərkəzlərinin işi də danışıqların əsas mövzularından olacaqdır.
Mütəxəssislərin fikrincə, sabit enerji mübadiləsi Azərbaycan tərəfinə elektrik şəbəkələrinin yüklənməsi problemini operativ həll etməyə və elektrik stansiyalarının işinin səmərəsini artırmağa imkan verəcəkdir.