Rusiya Ermənistana tədarük etdiyi qazın qiymətini qaldıracaqmı?
Bakı, 22 may, AZƏRTAC
Moskva istəsə belə, Ermənistana tədarük edilən Rusiya təbii qazının qiymətini qaldıra bilməz.
AZƏRTAC Rusiya mediasına istinadla xəbər verir ki, bu barədə Ermənistanın Baş naziri Nikol Paşinyan bildirib. Onun sözlərinə görə, iki ölkə arasında imzalanmış müqavilədə tədarükün konkret qiyməti açıq şəkildə göstərilir və uzunmüddətli perspektivdə dəyişə bilməz. Məhz buna görə də Ermənistan qiymət spekulyasiyasından qorunur.
“Mövcud müqavilə qüvvədə olduğu üçün qaz qiymətlərində artım ola bilməz”, - deyə Paşinyan əlavə edib.
Bir müddət əvvəl Rusiya Prezidenti Vladimir Putin Ermənistan üçün Rusiya qazının qiymətinin Avropa ölkələrinə tədarük edilən yanacağın qiymətindən xeyli aşağı olduğunu bildirmişdi. Yəni min kubmetr qaz Ermənistana 177,50 dollara, Avropaya isə təxminən 600 dollara satılır. Beləliklə, Rusiya qazı İrəvana Avropa İttifaqı (Aİ) ölkələrinə nisbətən üç dəfədən çox ucuz başa gəlir.
Paşinyan ölkəsinin Aİ-yə qoşulmaq istəyini dəfələrlə dilə gətirib. Rusiya isə Ermənistanın eyni vaxtda həm Gömrük İttifaqına, həm də Avropa İttifaqına üzvlüyünün mümkün olmadığını bildirib. Bu fonda Putin İrəvanı yekun qərar verməyə çağırıb.
Bölmənin digər xəbərləri
