Rusiya kəşfiyyat gəmisi britaniyalı pilotların fəaliyyətini pozmaq üçün lazerdən istifadə edib
London, 19 noyabr, AZƏRTAC
Böyük Britaniyanın müdafiə naziri Con Hili bildirib ki, ölkənin hava qüvvələrinin (RAF) pilotlarını izləyən Rusiya kəşfiyyat gəmisi ilk dəfə olaraq onların fəaliyyətini pozmaq üçün lazer şüalarından istifadə edib.
AZƏRTAC BBC-yə istinadla xəbər verir ki, nazir bunu son dərəcə təhlükəli addım adlandırıb və hökumətin məsələni çox ciddi şəkildə araşdırdığını vurğulayıb. Onun sözlərinə görə, “Yantar” adlı kəşfiyyat gəmisi son həftələrdə ikinci dəfə Britaniyanın ərazi sularına daxil olub və hazırda Şotlandiyanın şimalındadır. Nazir qeyd edib ki, bu gəmi informasiya toplamaq və Britaniyanın sualtı rabitə kabellərini xəritələndirmək üçün xüsusi dizayn edilib.
Con Hili Rusiyaya açıq mesaj göndərərək qeyd edib ki, əgər “Yantar” bu həftə cənuba doğru hərəkət etsə, Britaniya hazırdır. Nazir əlavə edib ki, “Yantar” Rusiyanın dənizdə həm kəşfiyyat, həm də münaqişə zamanı sabotaj həyata keçirmək üçün nəzərdə tutulmuş xüsusi donanmasının bir hissəsidir. Bu qüvvələr Rusiya Müdafiə Nazirliyinin dərin dəniz araşdırmalarına cavabdeh olan “GUGI” adlı qurum tərəfindən idarə olunur. Con Hili bildirib ki, Britaniya gəmiyə hər dəfə öz ərazi sularına yaxınlaşdığı anda nəzarət edir və müttəfiqləri ilə birlikdə onu izləyir.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
