Rusiyanın mətbuat nümayəndələri Azərbaycanda
Bakı, 30 yanvar, AZƏRTAC
Rusiyanın “RİA-Novosti” xəbər agentliyi, “Voyage” turizm jurnalı, “alexcheban.livejournal.com” saytı, “İnterfaks” informasiya agentliyi, “bigpicture.ru” saytı və “Kommersant” nəşriyyat evinin nümayəndələrindən ibarət qrup Azərbaycanda səfərdədir.
Səfər çərçivəsində media nümayəndələri “Şahdağ” qış-yay turizm kompleksini ziyarət edərək Azərbaycanın dağ-xizək turizm növü ilə yaxından tanış olublar.
Nümayəndə heyəti Mədəniyyət və Turizm Nazirliyinin turizm şöbəsinin müdiri Aydın İsmiyevlə də görüşüb.
Nazirliyi mətbuat xidmətindən AZƏRTAC-a bildirilib ki, görüşdə Azərbaycanın turizm infrastrukturu və potensialı, regionların turizm imkanları, mədəniyyət və turizm sahəsi üzrə statistik göstəricilər, xarici ölkələrdən ölkəmizə turist axını, burada keçirilən festival və beynəlxalq tədbirlər, inkişaf etmiş turizm növləri və elektron viza tətbiqi barədə suallar cavablandırılıb.
Media nümayəndələri “Bakı-2015” ilk Avropa Oyunlarına hazırlıq barədə də müxtəlif suallar vermişlər. Qonaqların diqqətinə çatdırılıb ki, bu istiqamətdə işlərin həyata keçirilməsi üçün xüsusi Təşkilat Komitəsi yaradılıb və bununla yanaşı, Mədəniyyət və Turizm Nazirliyi də bir sıra işlər həyata keçirir.
Bölmənin digər xəbərləri
