RUSİYANIN MÜDAFİƏ NAZİRİ TÜRKİYƏYƏ İŞGÜZAR SƏFƏRƏ GEDƏCƏK

25.08.2004 [19:28]
Çap et
A⁺ A^-

AZƏRTAC İTAR-TASS agentliyinə istinadla xəbər verir ki, Rusiyanın müdafiə naziri Sergey İvanov sentyabrın 2-3-də Türkiyədə işgüzar səfərdə olacaqdır. Səfər zamanı Ankarada o, türkiyəli həmkarı Vecdi Günəl ilə görüşəcək və Baş Qərargahın rəisi, ordu generalı Hilmi Özköklə danışıqlar aparacaqdır.

Görüşlərdə əsas diqqət ikitərəfli hərbi və hərbi-texniki əməkdaşlığın vəziyyətinə və inkişaf perspektivlərinə yönəldiləcəkdir. Tərəflər ərazi sularının hüdudlarından kənarda dənizdə təhlükəli hadisələrin qarşısının alınması haqqında sazişin hazırlanmasının, Rusiyada və Türkiyədə istirahət üçün bir-birinə hərbi qulluqçular göndərilməsi proqramının həyata keçirilməsinin gedişini müzakirə edəcəklər.

Gözlənildiyinə görə, Türkiyəyə Rusiya silahı, hərbi texnikası və döyüş sursatları göndərilməsi, habelə silah və texnikanın birgə istehsalı, Rusiya-İsrail layihəsi olan Ka-50-2 “Ərdoğan” zərbə vertolyotlarının Türkiyədə lisenziya ilə istehsalı və onların üçüncü ölkələrə ixracının mümkünlüyü məsələləri danışıqlarda mühüm yer tutacaqdır.

Ankara danışıqlarında beynəlxalq və regional təhlükəsizlik, beynəlxalq terrorizmlə mübarizə problemlərinə də toxunulacaqdır.