“Sabah”ın hücumçusu: Əldə etdiyimiz zəfər klubumuz üçün tarixi hadisədir, bundan həzz almalıyıq
Bakı, 3 iyun, AZƏRTAC
"Sabah"ın futbolçusu Pavol Şafranko Azərbaycan Kubokunun finalında "Qarabağ"a qalib gələrək titul qazandıqları oyunu şərh edib.
Matçla bağlı AZƏRTAC-a açıqlama verən slovakiyalı hücumçu bunları deyib: “Qarabağ”a qarşı çox çətin oyun oldu. Azarkeşlərin matçdan həzz aldıqlarını düşünürəm. Amma oynamaq baxımından olduqca çətin idi. Rəqibə böyük hörmətimiz var. Bu komandanın heyətində səviyyəli futbolçular var və onlar çox gözəl oyun nümayiş etdirdilər. Bəzi epizodlarda bəxtimiz gətirdi, amma nəticədə qələbə qazandıq”.
30 yaşlı forvard növbəti mövsüm mübarizə aparacaqları UEFA Avropa Liqası turniri barədə indidən danışmağın tez olduğunu bildirib: ”Avrokuboklar haqqında düşünmək istəmirəm. Ailəm ilə vaxt keçirib, bu qələbəni qeyd etmək niyyətindəyəm. Əldə etdiyimiz zəfər klubumuz üçün tarixi hadisədir, bundan həzz almalıyıq”.
P.Şafranko Bakı klubundakı gələcək taleyi barədə isə bunları söyləyib: “Mənim “Sabah”la daha bir il müqaviləm var. Gələcəkdə nələrin olacağını zaman göstərəcək”.
Qeyd edək ki, “Sabah” “Qarabağ”la əsas vaxtı 2:2 hesabı ilə başa çatan matçın əlavə vaxtında daha bir qol vuraraq, Azərbaycan Kubokunun qalibi olub.
Bölmənin digər xəbərləri
