Bakı, 6 mart, AZƏRTAC

Riyaziyyat fənnini öyrənməkdə çətinlik çəkən təkcə şagirdlər deyil. Hətta ali təhsilli valideynlər belə bəzən öz övladlarının adi məsələ və misallarının həllinə kömək edə bilmirlər.

Bu barədə AZƏRTAC-a açıqlamasında təhsil eksperti Nadir İsrafilov bildirib. Ekspert deyib: “Bunun səbəbi, peşəkar riyaziyyatçıların da etiraf etdiyi kimi, “riyaziyyatda yerinə yetirilməsi lazım olan ilkin şərt - aydın və mümkün olduğu qədər sadə üsullar aramaq” prinsipinə riayət olunmamasıdır. Proqram və riyaziyyat dərsliklərimiz sanki bu sahənin dərin biliciləri üçün yazılıb.

Nadir İsrafilov qeyd edib ki, həyatımızda önəmli yer tutan riyaziyyat qədim zamanlardan bu günə qədər insanların müxtəlif situasiyalarla qarşısına çıxan bir elmdir. Riyaziyyatın müxtəlif sahələrdə özünə yer tapır. Riyaziyyatı həyatda baş verən konkret təcrübələr vasitəsilə dərk etmək bəşəriyyət tarixinin riyaziyyata verdiyi dəyəri və əhəmiyyəti artırır.

“Riyaziyyat təhsili şagirdlərə gündəlik həyatda lazımlı olan hesablama bacarıqları ilə yanaşı, analiz, sintez və qiymətləndirmə kimi yuxarı səviyyəli idraki bacarıqlar da verir. Lakin bunlar sadə, anlaşıqlı dildə təqdim edilməlidir ki, lazımi nəticə əldə edilə bilsin”, - deyə Nadir İsrafilov qeyd edib.

Mütəxəssisin sözlərinə görə, bu gün informasiya və texnologiyanın sürətlə inkişaf etdiyini nəzərə alaraq cəmiyyətin riyazi təfəkkür qabiliyyətinə malik fərdlərə ehtiyacı olduğu fikrini söyləmək mümkündür: “Amma reallıq budur ki, şagirdlərin çoxu riyaziyyatın çətin bir dərs olduğunu düşünür və buna görə də uğur qazana bilməyəcəkləri qənaətinə gələrək riyaziyyat dərsinə qarşı mənfi mühakimələr formalaşdırırlar. Məktəbdə riyaziyyat fənninin tədrisi və müəllim yanaşması şagirdlərin bu sahəyə müsbət və ya mənfi münasibətlərinin formalaşmasında böyük rol oynayır. Lakin şagirdlərin riyazi düşünmək və danışmaq bacarıqlarına yiyələnmələri onlar üçün son dərəcə vacibdir”.

Ekspertin fikrincə, bu məqsədə çatmaq üçün təhsil sahəsində aparılan islahatlarda müəllimin üzərinə mühüm vəzifələr düşür: “Bu vəzifələrdən ən mühümü müəllimin yüksək tədris keyfiyyətinə nail olmasıdır. Bunun ən səmərəli yolu şagirdlərdə fənnə maraq yaratmaqdır. Şagirdin dərsə marağı isə onun müstəqilliyindən, prosesdə fəal iştirak etməsindən asılıdır”.

Bu işdə nəzəri material ilə praktik iş arasında əlaqə yaratmağın vacib şərt olduğunu bildirən Nadir İsrafilov deyib: “Bir məsələnin bir neçə yolla həll etdirilməsi şagirdin riyazi təfəkkürünün formalaşdırılmasına daha yaxşı təsir göstərir. Bir sıra mövzulara maraq yaratmaq üçün əyləncəli elementlərdən istifadə etmək də lazımi nəticə verir”.

“Elm və Təhsil Nazirliyinin Riyaziyyat və Mexanika İnstitutu, digər universitetlərinin müvafiq kafedraları tərəfindən şagirdlərdə riyazi dünyagörüşünün formalaşdırılması, onlarda riyaziyyat elminə marağın artırılması məqsədilə ümumtəhsil məktəblərində “Açıq qapı” günü keçirilməsi ənənəsi bərpa edilməlidir. Bu ayın ortalarına planlaşdırılan “Riyaziyyat və informatika müəllimlərinin həmrəylik forumu” müvafiq istiqamətdə mühüm addım olacaq. Forumda tanınmış riyaziyyatçı alimlərlə bu kimi məsələlərin müzakirəsi nəzərdə tutulur”, - deyə ekspert fikrini yekunlaşdırıb.