Sahib Alıyev: Azərbaycanın əvvəlki platformalarda qazandığı uğurlar Rusiya paytaxtında təsdiqləndi
Bakı, 27 may, AZƏRTAC
Azərbaycan, Rusiya prezidentlərinin və Ermənistan baş nazirinin Moskvadakı üçtərəfli görüşü əvvəlkilərdən, ilk növbədə, onunla fərqləndi ki, həlledici hansısa qərarla bağlı gözlənti yox idi. Əksinə, azacıq ehtiyat edilirdi ki, Paşinyanın Azərbaycanın ərazi bütövlüyünü tanıdığını konkret rəqəmlərlə təsdiqləməsindən razı qalmayanlar və bunu gizlətməyənlər ona öz istədiklərini dedirdə bilərdilər. Ancaq bu, baş vermədi. Polemikasından da göründüyü kimi, dili və məntiqi pozulmuş olan Paşinyan Moskvaya dəqiq ev tapşırığı ilə gəlmişdi.
Bu fikirləri AZƏRTAC-a açıqlamasında Milli Məclisin deputatı Sahib Alıyev deyib.
Deputatın sözlərinə görə, ev tapşırığı isə bundan ibarət idi ki, Ermənistan Zəngəzur dəhlizinin açılmasına ancaq orada giriş-çıxış rejiminə hay sərhədçiləri və gömrükçüləri nəzarət edəcəkləri, üzərində suverenliyini qoruyub saxlayacağı halda hazırdır. “Açığını deyək ki, Zəngəzur dəhlizinin üçtərəfli Bəyanatda nəzərdə tutulan rejim üzrə çalışması taktiki baxımdan bizə əl verirdisə, Paşinyana diktə olunan və onun təqdim etdiyi ev tapşırığındakı variant strateji baxımdan tam maraqlarımıza uyğundur.
Moskva görüşündə o da aydın oldu ki, Paşinyan Azərbaycanın Laçın yolunun başlanğıcında qurduğu nəzarət-buraxılış məntəqəsinin əleyhinə çıxdıqlarını qabartmağa çalışsa da, bunun perspektivsizliyini gözəl bilir. O, sadəcə, hay auditoriyasına oynayır ki, baxın, Kreml bizi dəstəkləmədiyi üçün vəziyyət belə alınıb. Elə məhz o səbəbdən də moskvadakıların deyil, qərbdəkilərin dedikləri ilə oturub-durmağa üstünlük verir”, - deyə S.Alıyev qeyd edib.
Deputatın fikrincə, görüşü təşkil edənlərin məqsədi, öz dilləri ilə desək, “v teme” olduqlarını və prosesləri nəzarətdə saxladıqlarını sərgiləmək idi. Amma bunun da bizə elə də isti-soyuğu yoxdur. Fikrimcə, Moskva görüşünə və onun, sadəcə, üçtərəfli formatda keçirilməsinə razılığımız da elə bu demək idi.
Moskva danışıqlarında əsas məqsədimizin digər platformalarda qazanılan uğurların Rusiya paytaxtında təsdiqlənməsi olduğunu bildirən S.Alıyev bildirib: “Biz məqsədimizə nail olduq. İstədiyimiz də oldu. Rusiya Prezidenti Vladimir Putin də tərəflərin artıq bir-birilərinin ərazi bütövlüklərini tanıdığını, yerdə qalan məsələlərin həlli mümkün və ikinci dərəcəli olduqlarını vurğuladı. Ümumiyyətlə, bütün platformalarda aparılan danışıqlar Azərbaycanın irəli sürdüyü, bir sıra hallarda isə hay təxribatlarının qarşısını alaraq əməliyyat keçirməklə diktə etdiyi gündəlik üzrə gedir ki, son Moskva görüşü də bu baxımdan istisna olmadı”.
Bölmənin digər xəbərləri
