Şair Ramaldanov: Bu təxribat Azərbaycan Ordusu üçün gözlənilməz deyildi
Bakı, 15 sentyabr, AZƏRTAC
Azərbaycan dövlətinin apardığı uğurlu siyasətin nəticəsində sonuncu keçirilmiş Brüssel danışıqları da daxil olmaqla bütün danışıqlarda Ermənistan tərəfi sərhədlərin delimitasiyası və sülh müqaviləsi məsələsində artıq müəyyən bir öhdəlik götürərək praktiki addımlar atmağa məcburdur. Ermənistanın baş naziri Nikol Paşinyan və bəzi deputatları sülh müqaviləsinin bağlanması ilə bağlı müəyyən fikirlər söyləyirdilər. Ancaq həmişə olduğu kimi Ermənistan dövləti heç vaxt müstəqil olmayıb. Hər zaman sözdə başqa, əməldə başqa hərəkətləri ilə seçilib.
Bunu AZƏRTAC-a açıqlamasında ehtiyatda olan polkovnik, hərbi ekspert Şair Ramaldanov deyib.
Ermənistanın xaricdən verilən sifarişlərin icrasına vərdiş etdiyini söyləyən hərbi ekspert bildirib ki, düşmən bu dəfə də xaric havadarlarının sifarişini yerinə yetirərək regionda gərginliyə səbəb olan addımlar atır. Onun sözlərinə görə, belə olan halda Ermənistan sərhədlərin tanınması, sülh müqaviləsinin bağlanması müddətini uzadır, həm də müəyyən dövlətlərin bu regiona diqqətini cəlb etməyə çalışır: “Bu gün geosiyasi arenada gedən proseslərə diqqət yetirsək, burada da məhz həmin maraqların toqquşmasını görmək olar. Təbii ki, Ermənistan tərəfi, orada olan revanşist qüvvələr bundan faydalanaraq aktivləşib. Digər yandan, hərbi rəhbərlik demək olar ki, Nikol Paşinyan tərəfindən o qədər də idarə olunmur. Ona görə də revanşist qüvvələrin addımlarını dəstəkləyərək mütəmadi olaraq atəşkəs pozulur və nəticədə təxribatlara əl atılır. Bu məsələdə Ermənistan siyasi rəhbərliyi də müəyyən şəkildə maraqlıdır. Ona görə də bu hadisələr sərhəddə baş verir. Sadəcə olaraq Ermənistanın hərbi-siyasi rəhbərliyi öz çirkin niyyətinə revanşist qüvvələrin aktivliyi, müxalifətin fəaliyyəti, ordunun tam şəkildə idarə olunmamasını bəhanə gətirir”.
Polkovnik Azərbaycan Ordusunun hər zaman olduğu kimi ayıq-sayıqlığını itirmədiyinə diqqət çəkib: “Bir neçə gün əvvəl ordu rəhbərliyi ilə keçirilən müşavirədə müdafiə naziri, general-polkovnik Zakir Həsənov Silahlı Qüvvələrin Müzəffər Ali Baş Komandanı İlham Əliyevin tapşırıqlardan irəli gələn göstərişləri verib. Atəşkəsin tez-tez pozulması, ola biləcək təxribatların qarşısını almaq üçün lazımi tədbirlərin görülməsi, ayıq-sayıqlığın artırılması, döyüş qabiliyyətinin və hazırlığının yüksəldilməsi, təminatla və digər məsələlərlə bağlı tapşırıqlar verilib. Azərbaycan Ordusunun bölmələri sərhəddə və Rusiya sülhməramlı qüvvələrinin müvəqqəti yerləşdiyi ərazidə əməliyyat şəraitinə daim nəzarət edir. Bu təxribat da Azərbaycan Ordusu üçün gözlənilməz deyildi. Ordumuz daim müşahidə aparır, hər hansı dəyişikliklərlə bağlı əlavə tədbirlər görür. Bunun nəticəsidir ki, Azərbaycan Ordusunun bölmələri erməni diversiya qruplarının fəaliyyətini aşkarlayıb və onların qarşısını alıb. Atəş mövqelərinə adekvat cavab atəşi açaraq düşmən tərəfini susdurmağa nail olub. Ermənistan həm canlı qüvvə, həm də texniki baxımdan çoxsaylı itkilərə məruz qalaraq təxribatını daha da genişləndirməyə imkan tapmayıb.
Şair Ramaldanov vurğulayıb ki, baş verən son hadisələrdə Azərbaycan Ordusu bir daha öz gücünü göstərdi: “Düşünürəm ki, erməni tərəfi burada daha çox hərbi yox, siyasi məqsədlərə üz tutub. Məqsəd Rusiyanın Ermənistan-Azərbaycan sərhədini nəzarət altına alması, müəyyən şəkildə Minsk qrupunun fəaliyyətini yenidən bərpa etməkdir. Ancaq bütün bunlara baxmayaraq, Ordumuz həmişə olduğu kimi, ayıq-sayıqlığı yüksək səviyyədə saxlayaraq, bütün təxribatların qarşısını adekvat şəkildə almağa qadirdir. Ona görə də bu təxribat erməni tərəfinin uğursuzluğu ilə nəticələnib. Təəssüflər olsun ki, bu təxribat zamanı Azərbaycan tərəfi də itkilər verib, şəhidlərimiz var.
Azərbaycanın gələcək təxribatların qarşısını almaq üçün əlavə tədbirlər görməsi istisna olunmur. Hər zaman olduğu kimi Azərbaycan maraqlarını, sərhədlərini qoruyub, qoruyur və bundan sonra da qoruyacaq. Azərbaycan Ordusu Ali Baş Komandan İlham Əliyevin hər hansı əmrini yerinə yetirməyə hazırdır”.
Bölmənin digər xəbərləri
