SALYAN RAYONU SAKİNİNİN QUŞ QRİPİNDƏN VƏFAT ETMƏSİ TƏSDİQLƏNMƏMİŞDİR

06.03.2006 [21:43]
Çap et
A⁺ A^-

AZƏRTAC Səhiyyə Nazirliyinin mətbuat xidmətinə istinadla xəbər verir ki, Ağciyər Xəstəlikləri İnstitutuna kəskin sətəlcəm diaqnozu ilə daxil olan Salyan rayonunun Dayıkənd sakini, 1986-ci il təvəllüdlü Nabat Əsgərovanın martın 3-də quş qripi xəstəliyindən vəfat etməsi ehtimalı təsdiqlənməmişdir. Laboratoriya analizləri onda quş qripi virusu aşkar etməmişdir. Buna baxmayaraq, həmin nümunələr daha dərin tədqiqat üçün Dünya Səhiyyə Təşkilatının (DST) ixtisaslaşdırılmış laboratoriyalarından birinə göndəriləcəkdir.

Bundan əlavə, Dayıkəndin daha 8 sakini yüksək hərarətlə müşayiət olunan kəskin respirator infeksiyası əlamətləri ilə Bakı klinikalarına qoyulmuşdur. Xəstələr DST-nın tövsiyələrinə müvafiq müalicə olunur, onlardan virusoloji tədqiqatlar üçün analizlər götürülmüşdür. Bu analizlər həm yerli, həm də xarici laboratoriyalarda öyrəniləcəkdir.

Həmin kənddə yeni xəstəlik halları qeydə alınmamışdır. Burada hər cür profilaktik və antiepidemioloji tədbirlər görülür.

Səhiyyə Nazirliyi gigiyena qaydalarına riayət etmək - əlləri tez-tez sabunla yumaq, quşlarla təmasdan çəkinmək xahişi ilə əhaliyə təkrar-təkrar müraciət edir. Xəstə, yaxud ölü quşla təmasdan sonra nasazlayan kimi dərhal tibb müəssisəsinə müraciət etmək lazımdır.

SALYAN RAYONU SAKİNİNİN QUŞ QRİPİNDƏN VƏFAT ETMƏSİ TƏSDİQLƏNMƏMİŞDİR

MÜƏLLİFLƏ ƏLAQƏ

Bölmənin digər xəbərləri