Sankt-Peterburqda ulu öndər Heydər Əliyevin doğum günü qeyd olunub
Moskva, 11 may, AZƏRTAC
Mayın 10-da ümummilli lider Heydər Əliyevin anadan olmasının 92-ci ildönümü münasibətilə Azərbaycanın Sankt-Peterburqdakı Baş konsulluğunun təşkilatçılığı, Ümumrusiya Azərbaycan Konqresinin regional nümayəndəliyi və “Naxçıvan” Milli-Mədəni Cəmiyyətinin iştirakı ilə Ulu Öndərin Sankt-Peterburqun Qoroxovaya küçəsindəki barelyefi önündə xatirə mərasimi keçirilib.
Baş konsulluğun mətbuat xidmətindən AZƏRTAC-a bildiriblər ki, tədbirdə Rusiya ictimaiyyətinin nümayəndələri, Azərbaycan diasporunun fəalları, Sankt-Peterburqda təhsil alan azərbaycanlı tələbələr iştirak ediblər. Tədbir iştirakçıları ümummilli lider Heydər Əliyevin barelyefi önünə gül dəstələri düzüb, görkəmli dövlət xadiminin şərəfli həyat yolu və fəaliyyətindən danışıblar.
Baş konsul Elşad Qulamov ümummilli lider Heydər Əliyevin müstəqil və müasir Azərbaycanın banisi olduğunu, onun müdrik siyasəti nəticəsində respublikamızın qısa müddətdə sürətlə inkişaf etdiyini və beynəlxalq aləmdə tanındığını diqqətə çatdırıb. Diplomat Ulu Öndərin gələcək nəsillər üçün möhkəm dövlətçilik mirası qoyduğunu və bu zəngin irsin qorunub saxlanılacağını bildirərək qeyd edib ki, Heydər Əliyev siyasətinin layiqli davamçısı Prezident İlham Əliyevin düşünülmüş islahatları nəticəsində müasir Azərbaycan günbəgün inkişaf edir. Ölkəmizin elm, mədəniyyət və idman sahələrində beynəlxalq səviyyəli tədbirlərə uğurla ev sahibliyi etdiyini iştirakçıların nəzərinə çatdıran diplomat, Avropa Oyunlarının ilk dəfə Bakıda keçirilməsinin respublikamızın yüksək nüfuzunun bariz nümunəsi olduğunu vurğulayıb.
Tədbirdə Milli Məclisin MDB Parlamentlərarası Assambleyasında nümayəndəsi Aydın Cəfərov, “Sankt Peterburqun Azərbaycan diasporu” ictimai təşkilatının sədri, Smolnı İnstitutunun keçmiş rektoru Heydər İmanov və “Naxçıvan” Milli-Mədəni Cəmiyyətinin rəhbəri İdris Qəhrəmanov çıxış edərək bildiriblər ki, Heydər Əliyev Azərbaycan dövlətçiliyinin qurucusu, həyat və fəaliyyətini Azərbaycan xalqına həsr etmiş görkəmli siyasət xadimidir. Ümummilli Liderin daim Azərbaycanın inkişafı üçün çalışdığını qeyd edən iştirakçılar, onun müdrik siyasəti və uzaqgörənliyi nəticəsində hələ 1960-1980-ci illərdən başlayaraq xeyli azərbaycanlı gəncin SSRİ-nin aparıcı ali məktəblərində təhsil aldığını və müstəqil Azərbaycan üçün yüksək səviyyəli peşəkar kadrların yetişdirildiyini bildirdilər.
Çıxışlarda vurğulandı ki, Heydər Əliyev xaricdə yaşayan həmvətənlərimizə daim böyük qayğı göstərib. Heydər Əliyev irsinin və siyasətinin bu gün Prezident İlham Əliyev tərəfindən uğurla davam etdirilməsi nəticəsində Azərbaycan yeni-yeni nailiyyətlərə imza atır.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
