QAN YADDAŞI
SƏBAİL RAYONUNDA 20 YANVAR FACİƏSİNİN İLDÖNÜMÜ İLƏ BAĞLI TƏDBİRLƏR PLANI HAZIRLANMIŞDIR
Bakı, 1 yanvar (AZƏRTAC). Səbail Rayon İcra Hakimiyyətindən (RİH) verilən məlumata görə, 20 Yanvar faciəsinin iyirminci ildönümü ilə bağlı tədbirlər planı hazırlanmışdır.
Planda rayonun bütün idarə və təşkilatlarında bu faciənin Azərbaycan tarixində azadlıq və müstəqillik uğrunda qəhrəmanlıq rəmzi kimi qeyd edilməsi ilə əlaqədar anma mərasimlərinin, 20 Yanvar şəhidlərinin ailə üzvləri və faciə zamanı əlil olmuş rayon sakinləri ilə görüşlərin keçirilməsi, onlara humanitar yardımın göstərilməsi, Şəhidlər xiyabanı ərazisində təmizlik və abadlıq işlərinin aparılması, rayondakı məscid və ibadət yerlərində 20 Yanvar faciəsi zamanı şəhid olanların xatirəsinə dini mərasimlərin keçirilməsi və s. nəzərdə tutulmuşdur. Yanvarın 18-19-da bütün tədris müəssisələrində təşkil ediləcək xüsusi dərslərdə bu hadisələrin mahiyyəti açıqlanacaqdır. Yanvarın 15-dən 18-dək rayondakı ali təhsil müəssisələrində konfrans və müzakirələr təşkil olunacaqdır.
Yanvarın 20-də Bakı vaxtı ilə saat 12.00-da şəhidlərin xatirəsi bir dəqiqəlik sükutla yad ediləcək, rayondakı sənaye müəssisələri, Bakı buxtasında reyddə duran gəmilər, avtomobillər vasitəsi ilə səs siqnalları veriləcəkdir. Matəm əlaməti olaraq rayonda Azərbaycanın dövlət bayraqları endiriləcəkdir.
Ümumxalq hüzn günü rayon ictimaiyyəti Şəhidlər xiyabanını ziyarət edəcəkdir.