Səbail rayonunda Xocalı faciəsinin 23-cü ildönümü qeyd edilib
Bakı, 24 fevral, AZƏRTAC
Xocalı faciəsinin ildönümü respublikamızın hər yerində olduğu kimi, Bakı şəhərinin Səbail rayonunda da geniş şəkildə qeyd olunur.
Səbail Rayon İcra Hakimiyyəti tərəfindən hazırlanmış tədbirlər planına uyğun olaraq rayonun idarə və təşkilatlarında, orta və ali məktəblərində faciə ilə bağlı sərgilər və müxtəlif tədbirlər keçirilir. Rayonun mədəniyyət müəssisələrində faciənin ildönümü ilə bağlı xatirə gecələri, foto və rəsm sərgiləri, şahidlərlə görüşlər təşkil olunur.
Tədbirlər çərçivəsində rayonun ali məktəblərində anım tədbirləri keçirilib, Dövlət Gənc Tamaşaçılar Teatrında və Badamdar Mədəniyyət Evində faciəyə həsr olunmuş tamaşalara ictimai baxış təşkil edilib. Fevralın 25-də rayonun orta və ali məktəblərində ilk dərslər Xocalı faciəsinə həsr olunacaq.
Faciənin ildönümü ərəfəsində Səbail Rayon İcra Hakimiyyətinin təşkilatçılığı ilə Bakı Oksford məktəbinin yeni istifadəyə verilmiş binasında Xocalı faciəsinə həsr olunmuş tədbir və Xocalı şəhərindən köçkün düşərək Səbail rayonda məskunlaşmış 22 ailənin nümayəndələri ilə görüş keçirilib.
Rayon icra hakimiyyətindən AZƏRTAC-a bildiriblər ki, əvvəlcə məktəbin foyesində şagirdlərin Xocalı faciəsi ilə bağlı əl işlərindən ibarət sərgi ilə tanışlıq olub.
Sonra şagirdlərin ifasında Xocalı faciəsinə həsr olunmuş tamaşa nümayiş etdirilib.
Mərasimdə çıxış edən Səbail Rayon İcra Hakimiyyətinin başçısı Asif Əsgərov Azərbaycan xalqının qan yaddaşı olan Xocalı faciəsi, ermənilərin zaman-zaman xalqımıza qarşı törətdikləri vəhşiliklər və Xocalı soyqırımı ilə bağlı həqiqətlərin dünya ictimaiyyətinə çatdırılması üçün görülməsi vacib olan işlər barədə ətraflı məlumat verib. Bildirilib ki, bu faciənin geniş ictimaiyyətə çatdırılması üçün Azərbaycan xalqının ümummilli lideri Heydər Əliyevin böyük əməyi olub. Məhz onun təşəbbüsü ilə Azərbaycan Respublikasının Milli Məclisində ilk dəfə bu məsələyə siyasi qiymət verilib, faciənin dünya ictimaiyyətinə çatdırılması məqsədi ilə işlərə başlanıb. Bu işlərin nəticəsidir ki, hər il faciənin ildönümü istər respublikamızda, istərsə də onun hüdudlarından kənarlarda geniş qeyd olunur, faciə qurbanlarının xatirəsi yad edilir, dünya ictimaiyyətinə ermənilərin iç üzü göstərilir.
Asif Əsgərov bu gün Azərbaycan Respublikasının Prezidenti İlham Əliyevin apardığı məqsədyönlü siyasət nəticəsində Xocalının, həmçinin işğal altında olan bütün Azərbaycan torpaqlarının düşməndən azad ediləcəyinə, ölkəmizin ərazi bütövlüyünün bərpa olunacağına əminliyini bildirib, lazım gələrsə dövlət başçısı, Ali Baş Komandanın əmri ilə silaha sarılaraq müharibə yolu ilə torpaqlarımızın azad olunması üçün bütün qüvvələrin səfərbər ediləcəyini söyləyib.
Qeyd olunub ki, fevral ayının 26-da rayonun sənaye, təhsil, səhiyyə və s. müəssisələrinin kollektivlərinin “Xocalı harayı” abidəsinə ziyarəti təşkil ediləcək. Həmin gün rayondakı məscidlərdə Xocalı faciəsi zamanı şəhid olmuş soydaşlarımızın ruhuna dualar oxunacaq, “Bibiheybət” və İçərişəhər “Cümə” məscidlərində ehsanlar veriləcək.
Tədbirdə çıxış edən Xocalı Rayon İcra Hakimiyyətinin nümayəndəsi Xəlil Vəliyev və başqaları ölkə rəhbərliyinin səyləri ilə Xocalının azad olunacağı günü səbirsizliklə gözlədiklərini və bu günün tezliklə gələcəyinə əmin olduqlarını bildiriblər.
Sonda Səbail rayonunda məskunlaşmış Xocalıdan olan köçkünlərə rayon icra hakimiyyəti tərəfindən maddi və ərzaq yardımları göstərilib.
Bölmənin digər xəbərləri
