Səbinə Cəlilova: Gimnastikaya gec başlayan uşaqların peşəkar gimnast olması çətindir
Bakı, 13 yanvar, AZƏRTAC
Azərbaycan Dövlət Uşaq Filarmoniyasının gimnastika üzrə qrupunda 20-dən çox uşaq var. Yaş aralığı əsasən 4 yaşdan başlayaraq 12 yaşa qədərdir. Bəzi uşaqlar istedadları ilə seçilir və biz uşaqları xüsusi hazırlayaraq onların tədbirlərdə iştirakına şərait yaradırıq.
Bunu AZƏRTAC-a açıqlamasında bədii gimnastika üzrə məşqçi-müəllim Səbinə Cəlilova söyləyib.
O vurğulayıb ki, əsas məqsəd uşaqların fiziki inkişafı, düzgün hərəkət etməsi və idmana sevgi qazanmasıdır.
İyirmi beş ilə yaxındır bədii gimnastika üzrə məşqçi-müəllim kimi fəaliyyət göstərdiyini diqqətə çatdıran S.Cəlilova deyib: “Müxtəlif tədbir və müsabiqələrdə iştirak etmişik. Sahəyə maraq böyükdür, amma gec başlayan uşaqların tam peşəkar gimnast olması çətindir. Vaxtında, yəni 4 yaşından başlayan uşaqlar üçün isə imkanlar daha genişdir. Bəzən şahidi oluruq ki, uşaq çox bacarıqlıdır, idmançı olmaq istəyir, amma valideynlərin vaxt və imkan çatışmazlığı buna mane olur. Peşəkar idman tamam fərqli rejim tələb edir. Uşaq hər gün, bəzən 3–4 saat məşq etməlidir, digər məşğuliyyətlərdən demək olar ki, imtina olunmalıdır. Biz sırf əlavə məşğuliyyət və sağlamlıq yönümlü dərslər keçirik”.
Bölmənin digər xəbərləri
