Sədr müavini: WUF13 Azərbaycanın şəhərsalma sahəsindəki nailiyyətlərinin beynəlxalq ictimaiyyətə çatdırılmasına xidmət edir VİDEO
Bakı, 13 may, AZƏRTAC
2022-2025-ci illər ərzində urbanizasiya və yaşayış məskənlərinin inkişafı məsələləri üzrə ixtisaslaşmış qurum olan “BMT-nin Məskunlaşma Proqramı” ilə əməkdaşlıq şəraitində işğaldan azad edilmiş Ağdam, Zəngilan və Xankəndi şəhərlərində olmaqla, üç Milli Şəhərsalma Forumu keçirilib, həmçinin 2023-cü ildə Bakı şəhərində ilk dəfə “Ümumdünya Məskunlaşma Günü” tədbiri təşkil edilib. Bu forumlar münaqişə va təbii fəlakətlərdən sonrakı dayanıqlı bərpa prosesləri və yenidənqurma, dayanıqlı və sağlam şəhərlər, mənzil təminatı va layiqli yaşayış məskənləri, Dayanıqlı İnkişaf Məqsədləri və Yeni Şəhər Gündəliyi, regional və beynəlxalq tərəfdaşlıqların inkişafı kimi aktual mövzuları özündə ehtiva edib və şəhərsalma sahəsində regionda ən dolğun müzakirələrin aparıldığı platformaya çevrilib.
AZƏRTAC xəbər verir ki, bu sözləri Azərbaycan Respublikası Dövlət Şəhərsalma və Arxitektura Komitəsi sədrinin müavini Dövlətxan Dövlətxanov “Şəhərlərdən sərhədsiz ticarətə: İxrac və logistika forumu”nda deyib.
O bildirib ki, sözügeden milli forumlar dünyanın şəhərsalma sahəsində ən nüfuzlu tədbirlərindən olan Ümumdünya Şəhərsalma Forumunun 13-cü sessiyasının Bakı şəhərində keçirilməsinə dair verilən qərarın əsas həlledici faktoru olub: “Regionumuzda ilk dəfə olaraq baş tutacaq bu tədbir həm də ölkəmizin dayanıqlı va insanyönümlü şəhərsalma sahəsində apardığı siyasətin dünya miqyasında layiqincə dəyərləndirilməsidir. Ümumdünya Şəhərsalma Forumu COP29-dan sonra ikinci böyük BMT tədbiri olmaqla yanaşı, dünya üzrə şəhərsalma sahəsində ən mötəbər və genişmiqyaslı forum hesab olunur. İki ildən bir təşkil olunan bu forumun məqsədi dayanıqlı urbanizasiya və şəhərsalma sahəsində ölkələr tərəfindən həyata keçirilən siyasət barədə ictimaiyyətin məlumatlandırılması, şəhərlərin dayanıqlı inkişafına vahid yanaşmanın təbliğ edilməsi, açıq debatlar və təcrübə mübadiləsi vasitəsilə biliklərin artırılması va əməkdaşlığın gücləndirilməsidir. Ölkəmizin dünyada artan nüfuzu fonunda bu beynəlxalq tədbir həm də Azərbaycanın inkişaf strategiyalarının, işğaldan azad edilmiş ərazilərinə Böyük Qayıdəşa dair I Dövlət Proqramının uğurlu nəticələrinin və şəhərsalma sahəsindəki nailiyyətlərinin beynəlxalq ictimaiyyətə çatdırılmasına xidmət edir”.
D.Dövlətxanov qeyd edib ki, BMT-nin insanların məskunlaşması problemlərinə həsr olunmuş birinci konfransının 50-ci ildönümünə və “Yeni Şəhər Gündəliyi” sənədinin icrasının 10 illiyinə təsadüf edən bir tarixdə Bakıda keçiriləc forum “Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri” mövzusu adı altında təşkil olunacaq, şəhərsalma sahəsində ən ciddi çağırışlardan olan mənzil məsələsini gündəmə daşıyacaq: “Bu forumun əvvəlki tədbirlərdən əsas fərqləndirici xüsusiyyətlərindən biri burada yüksəksəviyyəli siyasi iştirakçılığın olmasıdır. Belə ki, ilk dəfə olaraq forumda Liderlər sammiti təşkil ediləcək, burada dövlət və hökumət başçıları şəhərlərin gələcəyi ilə bağlı müzakirələr aparacaqlar. Bu, mənzil və şəhər inkişafının yalnız texniki məsələ deyil, qlobal qərarvermənin ən yüksək səviyyəsində liderlik tələb edən strateji prioritetlər olduğunu əks etdirir”.
Bölmənin digər xəbərləri
