Şəhid anası: Vətən sağ olsun deyib övladlarımızı cəbhəyə yolladıq VİDEO
Tərtər, 6 oktyabr, Tahir Ağaməmmədov, AZƏRTAC
30 işğal altında qalan torpaqlarımız 2020-ci ilin payızında şəhidlərimizin qanı bahasına azad olundu. Bu sevinci xalqımıza yaşadanlar sırasında Suqovuşanın azadlığı uğrunda şəhadətə yüksələn Aslan Hüseynov da var.
AZƏRTAC-ın bölgə müxbiri Tərtər rayonunun Qaradağlı kəndində şəhidin valideynləri ilə görüşüb, onlarla qəhrəman Vətən oğlunun həyatı və şərəfli döyüş yolu haqqında söhbət edib.
Atası Malik Hüseynov deyir ki, həmişə vətənpərvərliyi ilə seçilən Aslan hərbi xidməti başa vurandan sonra müddətdən artıq hərbi xidmətçi kimi fəaliyyətə başlayıb. 2016-cı il Aprel döyüşlərində yaralansa da, yolundan dönməyib. Gizir hazırlığı kursunu başa vurub xidmətini davam etdirib. 2020-ci il Vətən müharibəsində Suqovuşan döyüşlərində düşmənin 3 tankını vurub sıradan çıxarıb. Sentyabrın 30-da şəhid olub.
Malik kişi deyir ki, Aslan şəhid olacağını bilirdi: “Sentyabrın 23-də evə gəlmişdi. Dostu ilə Tərtərin bütün küçələrini gəzmişdi. Ona şəhid olacağını demişdi... Allah bütün şəhidlərimizə rəhmət eləsin, qazilərə cansağlığı versin. Vətən sağ olsun”.
Anası İradə xanım Aslan haqqında danışmağın nə qədər çətin olsa da qürurlu olduğunu deyir: “Vətən sağ olsun deyib övladlarımızı cəbhəyə yolladıq. Aslanla bərabər digər oğlumu da yola salmışdıq. İkisi də ön cəbhədə idi. Biri şəhidlik zirvəsinə ucaldı, digəri sağ-salamat gəldi... Aslan Vətənini sevən, Vətənə bağlı insan idi. Çox məsuliyyətli idi. Özü də bilirdi şəhid olacaq. Deyirdi ki, erməni kimdir ki, bizim torpaqlarımız onların tapdağı altında qala. Aslan cəsur oğlan idi. Aprel döyüşlərində yaralansa da, evə qayıtmaq istəmirdi. Bu gün üzümdə qürur, ürəyimdə nisgil var. Aslan haqqında danışmaq nə qədər çətin olsa da, qürurla danışıram. Şəhid elin şəhididir. Azərbaycanın Qarabağ kimi yarasına mənim oğlumun timsalında 3000 mindən artıq şəhid məlhəm oldu. Ana kimi həmişə qürurlanıram, amma onların nisgili, yarası gedən deyil. Vətən sağ olsun... Aslanın iki övladı – bir oğlu, bir qızı yadigar qalıb, onun adına layiq övlad olsunlar”.
Qeyd edək ki, Azərbaycan Respublikası Silahlı Qüvvələrinin hərbi qulluqçusu Aslan Hüseynov Prezident İlham Əliyevin sərəncamları ilə ölümündən sonra “Azərbaycan Bayrağı” ordeni, “Vətən uğrunda”, “Suqovuşanın azad olunmasına görə” və “Cəsur döyüşçü” medalları ilə təltif olunub. Aslan Hüseynova sağlığında isə “Hərbi xidmətdə fərqlənməyə görə”, “Azərbaycan Ordusunun 100 illiyinə görə” medalları verilib. Şəhidin adının əbədiləşdirilməsi üçün Tərtər şəhərində küçələrdən birinə onun adı verilib, doğulduğu kənddə isə adına bulaq inşa edilib.
Bölmənin digər xəbərləri
