ŞƏKİ-ZAQATALA BÖLGƏSİNDƏ SEÇİCİLƏR YÜKSƏK FƏALLIQ GÖSTƏRMİŞLƏR
Seçkilərin yekunlarına görə, bölgə üzrə adları seçici siyahılarına daxil edilmiş 330 min 998 nəfər seçicinin 164 min 998 nəfəri və yaxud 49,8 faizi səsvermədə iştirak etmişdir. Bölgə üzrə ən yüksək seçici fəallığı 112 saylı Qax seçki dairəsində qeydə alınmışdır. Burada seçicilərin 58 faizi səsvermədə iştirak etmişdir.
Digər rayonlar üzrə səsvermənin yekun nəticələri aşağıdakı kimi olmuşdur:
X X X
109 saylı Balakən seçki dairəsi dairə seçki komissiyasının sədri Vahid Əliyevdən aldığımız məlumata görə, 36 min 69 seçicinin 16 min 672 nəfəri səsvermədə iştirak etmişdir. Bu, ümumi seçicilərin 46,2 faizini təşkil edir. Şəffaf və demokratik şəraitdə keçən səsvermənin gedişini 310 nəfər yerli və 8 nəfər beynəlxalq müşahidəçi izləmişdir. Dairənin 22 seçki məntəqəsində beynəlxalq qurumların iştirakı ilə exit-poll keçirilmişdir.
Dairənin Tülü kəndində yerləşən 13 saylı seçki məntəqəsində səs verən 83 yaşlı kənd ağsaqqalı, müharibə veteranı Məhəmməd Əzimov bu seçkilərin öz demokratikliyi ilə əvvəlkilərdən tam fərqləndiyini, səs verdiyi məntəqədə seçkilərin yüksək səviyyədə təşkil olunduğunu xüsusi vurğulamışdır.
X X X
110 saylı Zaqatala seçki dairəsindən verilən məlumata görə, 41 seçki məntəqəsinin hamısında parlament seçkiləri mütəşəkkil qaydada başa çatmışdır. Yekun nəticəyə görə, səsvermədə 23 min 758 nəfər seçici iştirak etmişdir ki, bu da ümumi seçicilərin 57,4 faizini təşkil edir. Səsvermənin gedişini 206 nəfər yerli və 8 nəfər beynəlxalq müşahidəçi izləmişdir.
Dairənin Qımır kəndindəki 34 saylı seçki məntəqəsində səs verən 80 yaşlı el ağsaqqalı Məcid Məcidov ölkə başçısının siyasətini ürəkdən bəyəndiyini, sabitliyimizin, əmin-amanlığımızın və inkişafımızın davam etdirilməsinə kömək göstərəcək namizədə səs verdiyini bildirmişdir.
X X X
111 saylı Zaqatala-Balakən seçki dairəsindən aldığımız məlumata görə, 9 namizədin mübarizə apardığı bu dairə üzrə Zaqatala rayonunda 27, Balakən rayonunda isə 11 seçki məntəqəsində səsvermə olmuşdur. Məntəqələrdə səsvermənin gedişini 324 nəfər yerli müşahidəçi ilə yanaşı, Almaniya, Böyük Britaniya, Belarus, Türkiyə və digər ölkələrdən olan 10 nümayəndə də izləmişdir. Yekun nəticəyə görə, bu dairə üzrə qeydə alınmış 38 min 649 seçicinin 20 min 484 nəfəri və ya 53 faizi səsvermədə iştirak etmişdir.
X X X
112 saylı Qax seçki dairəsində müşahidəçilik missiyasını yerinə yetirən MDB İcraiyyə Komitəsinin nümayəndəsi Yuri Butıryev AZƏRTAC-ın müxbirinə müsahibəsində demişdir: “Biz bu gün 7 seçki məntəqəsinə baş çəkdik. Bütün məntəqələrdə Seçki Məcəlləsinin tələblərinə ciddi riayət edildiyinin şəxsən şahidi olduq. Komissiya üzvləri öz funksiyalarını əla yerinə yetirirlər. Seçicilərin fəallığı isə bizi heyrətləndirdi. Açığı, biz insanların belə yüksək əhval-ruhiyyə ilə səsverməyə gələcəklərini o qədər də gözləmirdik. Səsvermə yüksək səviyyədə təşkil olunmuşdur. Seçkilərin keçirilməsinə heç bir iradım yoxdur”.
Dairə seçki komissiyasının sədri Abdukərim Əliyevin verdiyi məlumata görə, səsvermədə 20 min 708 nəfər seçici iştirak etmişdir ki, bu da ümumi seçicilərin 58 faizini təşkil edir.
X X X
113 saylı Şəki şəhər seçki dairəsinin 20 saylı seçki məntəqəsində səs verən ali kateqoriyalı müəllim Müşafərim Əhmədova səsvermənin şəffaf və demokratik keçməsində ölkə başçısının son Sərəncamlarının böyük əhəmiyyətini xüsusi qeyd etmişdir.
Dairə seçki komissiyasının sədri İlham Qəhrəmanovdan aldığımız məlumata görə, seçkilərin yekun nəticələrinə əsasən, 34 min 738 seçicinin 14 min 495 nəfəri və ya 41,7 faizi səsvermədə iştirak etmişdir.
114 saylı Şəki kənd birinci dairəsindən verilən məlumata görə, saat 19.00-dək dairə üzrə 35 min 453 seçicidən 12 min 547 nəfəri səsvermədə iştirak etmişdir ki, bu da ümumi seçicilərin 35,4 faizini təşkil edir. Dairə üzrə səsvermənin gedişini yerli müşahidəçilərlə yanaşı, ATƏT-in Seçki Müşahidə Missiyasının üzvləri, habelə MDB və digər ölkələrdən olan müşahidəçilər izləmişlər.
115 saylı Şəki kənd ikinci seçki dairəsində 11 namizəd deputat mandatı uğrunda mübarizə aparırdı. Bu dairədə seçicilərin 47,8 faizi və ya 16199 nəfər seçici səsvermədə iştirak etmişdir. Səsvermənin gedişini 344 yerli və 8 nəfər beynəlxalq müşahidəçi izləmişdir. Dairənin 42 seçki məntəqəsinin hamısında exit-poll keçirilmişdir.
X X X
116 saylı Qəbələ seçki dairəsində səsvermədə 18 min 716 seçici iştirak etmişdir ki, bu da ümumi seçicilərin 51,6 faizini təşkil edir. 7 namizədin mübarizə apardığı bu dairə üzrə 45 seçki məntəqəsində səsvermənin gedişini 314 nəfər yerli və 4 nəfər beynəlxalq müşahidəçi izləmişdir. Səsvermənin gedişində ciddi qanun pozuntuları qeydə alınmamışdır.
X X X
117 saylı Oğuz-Qəbələ seçki dairəsindən verilən məlumata görə 56 seçki məntəqəsinin hamısında səsvermə mütəşəkkil qaydada başa çatmışdır. Yekun nəticəyə görə, dairə üzrə qeydə alınmış 38812 seçicinin 21 min 385 nəfəri və ya 55,1 faizi səsvermədə iştirak etmişdir.
Bölmənin digər xəbərləri
