QAN YADDAŞI
ŞƏKİDƏ 20 YANVAR FACİƏSİNİN İLDÖNÜMÜ İLƏ BAĞLI SİLSİLƏ TƏDBİRLƏR KEÇİRİLİR
Şəki, 10 yanvar (AZƏRTAC). Azərbaycan xalqının qan yaddaşına əbədi həkk olunmuş 20 Yanvar faciəsinin iyirminci ildönümü ilə əlaqədar Şəkidə silsilə tədbirlərin keçirilməsinə başlanılmışdır.
Şəhər İcra Hakimiyyətinin xüsusi tədbirlər planına uyğun olaraq, rayonun ali, orta ixtisas və ümumtəhsil məktəblərində, mədəniyyət evləri və kitabxanalarda Qanlı Yanvar faciəsinin ildönümü ilə bağlı ədəbi-bədii gecələr, elmi konfranslar, inşa yazı və şeir müsabiqələri, idman yarışları keçirilir, kitab və rəsm sərgiləri təşkil olunur, xüsusi bröşürlər hazırlanır. Ümumxalq hüzn gününədək şəhərdə, habelə qəsəbə və kəndlərdəki “Şəhidlər xiyaban”larında iməciliklər keçiriləcək, səliqə-səhman yaradılacaqdır. Hüzn günü ərəfəsində şəhid ailələrinə maddi yardımlar göstəriləcək, məscidlərdə şəhidlərin ruhuna dualar oxunacaqdır.
Yanvarın 19-da rayonun bütün təhsil müəssisələrində 20 Yanvar faciəsinə həsr olunmuş xüsusi dərslər keçiriləcəkdir.
Yanvarın 20-də “Şəhidlər xiyabanı”nda ümumşəhər mitinqi keçiriləcək, şəhid məzarlarının üzərinə gül-çiçək düzüləcəkdir. Saat 12.00-da rayonun bütün yaşayış məntəqələrində 20 Yanvar şəhidlərinin xatirəsi bir dəqiqəlik sükutla yad ediləcəkdir.