ŞƏKİDƏ PREZİDENT SƏRƏNCAMINDAN İRƏLİ GƏLƏN VƏZİFƏLƏRİN İCRASINA BAŞLANMIŞDIR
Şəhər icra hakimiyyətindən AZƏRTAC-ın müxbirinə bildirmişlər ki, tədbirlər planında Kişçay, Daşağıl və Şinçay çaylarında irimiqyaslı sahilbərkitmə işlərinin aparılması nəzərdə tutulmuşdur. Bu məqsədlə hazırda “Meliorasiya və Su Təsərrüfatı” ASC-nin sifarişi və vəsaiti ilə Aşağı Şabalıd kəndinin sel sularından mühafizəsi üçün Şin çayında 224 metr uzunluğunda, habelə Oraban, Baş Kəldək, Baş və Aşağı Küngüt kəndlərində əkin sahələrinin seldən mühafizəsi və İsmayıllı-Balakən şose yolunun yuyulmasının qarşısını almaq məqsədi ilə Daşağıl çayında 100 metr uzunluğunda yeni bəndlərin tikintisinə başlanılmışdır. Tikinti işlərini “Şəkisutikinti” törəmə müəssisəsi həyata keçirir.
Tədbirlər planına uyğun olaraq, hazırda Baş Göynük və Böyük Dəhnə kəndlərində “Azərsu” Səhmdar Cəmiyyətinin xətti ilə yeni artezian quyuları qazılır.
Bundan əlavə, 3500 yerlik şəhər stadionunun yenidən qurulması, Cəyirli, Şəkikənd və Aran kəndlərinin ərazisindəki 3 min hektar torpaq sahəsinin suvarılmasının təmin edilməsi üçün Əlicançay çayından 14 kilometr uzunluğunda kanalın çəkilməsi, habelə Şəki şəhərinin mərkəzi ilə axan Qurcana və Dəyirmanarxı çaylarının yatağının təmizlənməsi və sahil divarlarının əsaslı bərpası üçün ilkin layihə smeta sənədlərinin hazırlanmasına da başlanılmışdır.
Bölmənin digər xəbərləri
