Şəkidə “Vətənin müdafiəsinə hazıram!” devizi altında kütləvi tədbir keçirilib
Bakı, 27 mart, AZƏRTAC
Martın 27-də Səfərbərlik və Hərbi Xidmətə Çağırış üzrə Dövlət Xidməti (SHXÇDX) Azərbaycan Respublikası Gənclər Fondu və Şəki Şəhər İcra Hakimiyyəti ilə birgə Heydər Əliyev Mərkəzində “Vətənin müdafiəsinə hazıram!” devizi altında 31 mart - Azərbaycanlıların Soyqırımı Günü ilə bağlı kütləvi tədbir keçirib.
Xidmətdən AZƏRTAC-a bildiriblər ki, tədbirdən öncə Xidmət rəisinin müavini, general-mayor Yusif Mirzəyev, Şəki Şəhər İcra Hakimiyyətinin başçısı Elxan Usubov və qonaqlar ümummilli lider Heydər Əliyevin abidəsini ziyarət edərək önünə gül dəstəsi qoyublar.
Şəki şəhər Heydər Əliyev Mərkəzində davam etdirilən tədbirdə əvvəlcə Azərbaycan Respublikasının dövlət himni səsləndirilib.
Sonra tədbirin iştirakçıları - orta məktəblərin yuxarı sinif şagirdləri, gənclər, ictimaiyyətin, şəhid ailələrinin nümayəndələri, veteranlar və rayonun hüquq-mühafizə orqanlarının rəhbərləri soyqırımı qurbanlarının xatirəsini ehtiramla anıblar.
Şəki Şəhər İcra Hakimiyyətinin başçısı Elxan Usubov tədbirdə çıxış edərək tədbirin əhəmiyyətini xüsusi vurğulayıb. O, Şəki məktəbliləri arasında vətənpərvərlik mövzusunda Xidmət tərəfindən müsabiqənin keçirilməsinin gənc nəslin Vətənə bağlılıq ruhunda yetişməsinə təsirini diqqətə çatdırıb. Bildirib ki, 1918-ci ilin martından başlayaraq daşnaklar tərəfindən Bakının və ümumilikdə Qafqazın azərbaycanlılardan təmizlənməsi məqsədilə hiyləgər və amansız planın icrasına başlanılıb. Bu zaman Bakı, Şamaxı, Quba qəzalarında, Qarabağ, Zəngəzur, Naxçıvan, Lənkəran və digər bölgələrdə ermənilər xüsusi amansızlıqla dinc azərbaycanlılara qarşı soyqırımı törədib, kişilərlə yanaşı minlərlə ahıl, qadın və uşağı da məhz azərbaycanlı olduqları üçün dəhşətli üsullarla qətlə yetiriblər.
Səfərbərlik və Hərbi Xidmətə Çağırış üzrə Dövlət Xidməti rəisinin müavini, general-mayor Yusif Mirzəyev gənc nəslin hərbi vətənpərvərlik ruhunda tərbiyəsi istiqamətində Xidmət tərəfindən görülən işlərdən söhbət açıb. Bildirilib ki, Azərbaycan tarixinin hərtərəfli öyrənilməsi vətənpərvərlik tərbiyəsində vacib rol oynayır. Ermənilər tərəfindən azərbaycanlılara qarşı soyqırımı törədilib. Bu gün respublikamızın torpaqlarının 20 faizi hələ də işğal altında saxlanılıb. Vətəni, torpağı, daimi yaşayış yeri olmayan, yerli şəraitə dırnaqarası “uyğunlaşmağı”, güclülərə “xidmət göstərməyi” yaxşı bacaran ermənilər daim xəyanətkarlıq, satqınlıq “nümunəsini” ortaya qoyublar. Bu nümunələrdən biri də 1918-ci ilin martında azərbaycanlılara qarşı törədilmiş soyqırımıdır. Həmin il martın 30-da erməni-bolşevik birləşmələri Bakı şəhərini gəmilərdən yaylım atəşinə tutub, ardınca silahlı daşnaklar azərbaycanlıların evlərinə hücum edərək amansız qətllər törədiblər. Kütləvi qırğınlar zamanı təkcə Bakıda 12 min, bəzi mənbələrə görə isə 20-25 min dinc azərbaycanlı qətlə yetirilib. Uzun müddət bu faktlar gizlədilsə də, 1998-ci il martın 26-da ümummilli lider Heydər Əliyevin imzaladığı “Azərbaycanlıların soyqırımı haqqında” Fərmanda həmin dəhşətli hadisələrə adekvat siyasi qiymət verilib və 31 mart Azərbaycanlıların Soyqırımı Günü elan edilib.
Gənclər Fondunun şöbə müdiri Orxan Ərəbov ölkəmizdə həyata keçirilən gənclər siyasətindən danışıb.
Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının üzvü Emin Həsənli 1918-ci ildə daşnak-bolşevik birləşmələrinin Azərbaycanın müxtəlif bölgələrində törətdikləri kütləvi qırğınların insanlığa və bəşəri dəyərlərə sığmayan cinayət olduğunu deyib. O, XXI əsrdə də ermənilərin bu mənfur əməllərini davam etdirdiyini vurğulayıb.
Qarabağ Müharibəsi Veteranları, Əlilləri, Şəhid Ailələri İctimai Birliyinin Şəki rayon təşkilatının sədri Məmmədnuru Əzizov ermənilərin xalqımıza qarşı həyata keçirdikləri qanlı soyqırımı aktlarının gənclərə çatdırılmasının vacibliyini, bu məqsədlə keçirilən anım tədbirlərinin gənc nəslin vətənpərvərlik ruhunda tərbiyə edilməsində mühüm rolu olduğunu bildirib.
Tədbirdə Şəki şəhər orta məktəb şagirdləri arasında 31 mart - Azərbaycanlıların Soyqırımı Günü mövzusunda keçirilmiş yazı müsabiqəsinin qalibləri mükafatlandırılıb. Münsiflər heyətinin qərarına əsasən 1-ci yerə Şəki şəhər 10 nömrəli tam orta məktəbin şagirdi Nərgiz Abbaszadə, 2-ci yerə Bideyiz kənd tam orta məktəbin şagirdi Nuray Lətifli, 3-cü yerə isə Şəki şəhər 8 nömrəli tam orta məktəbin şagirdi Fəridə Mustafayeva layiq görülüblər. Qaliblərə müvafiq diplomlar və mükafatlar təqdim edilib.
Sonda Şəki rayon özfəaliyyət dərnəyi və məktəblilərin vətənpərvərlik ruhunda hazırladıqları ədəbi-bədii proqram təqdim olunub.
Bölmənin digər xəbərləri
