SƏNAYE VƏ ENERGETİKA NAZİRLİYİNDƏ GÖRÜŞ
AZƏRTAC xəbər verir ki, dekabrın 22-də sənaye və energetika naziri Natiq Əliyev Gürcüstanın xarici işlər naziri Gela Bejuaşvili və yanacaq və energetika naziri Nika Gilauri ilə görüşmüşdür. Söhbət zamanı Gürcüstanın və Azərbaycanın təbii qazla təmin edilməsi və enerji təhlükəsizliyi məsələləri müzakirə edilmişdir. Fikir mübadiləsi zamanı bu günlə yanaşı, uzunmüddətli perspektiv üçün qarşıda duran vəzifələr ciddi araşdırılmışdır. Regional, eləcə də Avratlantika məkanı daxilində enerji siyasəti çərçivəsində Azərbaycan və Gürcüstanın üzərinə düşən strateji vəzifələrlə bağlı mülahizələr bildirilmişdir.
Nazirlər konkret faktlar əsasında beynəlxalq neft-qaz layihələrinin uğurla həyata keçirildiyini vurğulamışlar. Rusiyadan təbii qazın idxalı, beynəlxalq layihələr çərçivəsində xam neft və təbii qazın ixracı və qarşılıqlı maraq doğuran digər məsələlər də hərtərəfli müzakirə edilmişdir.
Bölmənin digər xəbərləri
