Sənaye və Energetika Nazirliyində Xocalı faciəsinin ildönümünə həsr olunmuş anma tədbiri keçirilmişdir
Bakı, 22 fevral (AZƏRTAC). Fevralın 22-də Azərbaycan Respublikası Sənaye və Energetika Nazirliyində Xocalı faciəsinin 21-ci ildönümünə həsr olunmuş anma tədbiri keçirilmişdir.
AZƏRTAC xəbər verir ki, əvvəlcə Xocalı faciəsində həlak olanların xatirəsi bir dəqiqəlik sükutla yad edilmişdir.
Tədbirdə çıxış edən sənaye və energetika nazirinin müavini Gülməmməd Cavadov Xocalı faciəsinin acı nəticələrindən danışmışdır. Bildirilmişdir ki, 1992-ci il fevralın 25-dən 26-na keçən gecə erməni qəsbkarları Xocalıda dinc sakinlərə hücum edərək, şəhəri artilleriya atəşinə tutmuşlar. Etnik zəmində törədilən vəhşiliklər nəticəsində Xocalı əhalisindən 613 nəfəri öldürülmüş, mindən artıq dinc sakin müxtəlif dərəcəli güllə yarası almış, 1275 nəfər girov götürülmüş, 150 nəfəri isə itkin düşmüşdür.
Sonra tədbirə xüsusi dəvət olunmuş Bakı Dövlət Universitetinin kafedra müdiri Anar İsgəndərzadə 1980-ci illərin sonundan başlayaraq Ermənistanın Azərbaycana qarşı irəli sürdüyü ərazi iddiaları və törətdiyi terror əməlləri haqqında ətraflı danışmışdır.
Qeyd olunmuşdur ki, SSRİ-nin dağılması ərəfəsində yaranmış özbaşınalıqdan istifadə edən Ermənistan Azərbaycana qarşı ərazi iddiaları ilə çıxış etmiş və Xocalı şəhəri bu qanlı təcavüzün ilk hədəflərindən biri olmuşdur. Xocalıya edilən təcavüzdə Xankəndidə yerləşən keçmiş sovet ordusunun 366-cı alayının şəxsi heyəti də iştirak etmişdir.
Sonda tədbir iştirakçılarına Xocalı soyqırımı və digər qətliamlar haqqında kitablar təqdim edilmişdir.
Bölmənin digər xəbərləri
