Belqrad, 3 iyun, AZƏRTAC

Serbiyanın “Studio B” televiziya kanalında təqribən bir saat yarım canlı yayımlanan “Beograde dobro vece” (Belqrad axşamın xeyir) proqramı bütövlükdə Azərbaycanın milli bayramı - 28 May - Respublika Gününə həsr olunub.

Verilişə dəvət olunmuş Azərbaycanın Serbiyadakı səfirliyinin müşaviri Azad Paşayev müsəlman Şərqində ilk demokratik parlamentli respublika olan Azərbaycan Xalq Cümhuriyyətinin yaradılmasından, qədim tarix və dövlətçilik ənənələrinə malik Azərbaycan xalqı üçün bu respublikanın əhəmiyyətindən, burada hətta bir sıra Avropa dövlətlərindən daha əvvəl qadınlara seçki hüququnun verilməsindən bəhs edib. O, Azərbaycan xalqının uzun illər apardığı milli azadlıq mübarizəsi nəticəsində 1991-ci il oktyabrın 18-də “Dövlət Müstəqilliyi haqqında Konstitusiya Aktı”nın qəbul edilməsi ilə Azərbaycanın dövlət müstəqilliyinin bərpa edilməsi barədə məlumat verib və indiki dünyəvi, demokratik və hüquqi Azərbaycan Respublikasının 1918-1920-ci illərdə mövcud olmuş Azərbaycan Xalq Cümhuriyyətinin varisi olduğunu vurğulayıb. A.Paşayev müstəqilliyin ilk illərində xeyli çətinliklərlə üzləşməsinə baxmayaraq Azərbaycan Respublikasının ötən 25 il ərzində bir çox sahələrdə uğurlara imza atdığını, Azərbaycan xalqının ümummilli lideri, böyük siyasi təcrübəyə malik görkəmli dövlət xadimi Heydər Əliyevin müəyyənləşdirdiyi məqsədyönlü və uzaqgörən siyasət, o cümlədən ölkəmizdə həyata keçirilən demokratik islahatlar, irimiqyaslı enerji və nəqliyyat dəhlizi layihələri nəticəsində Azərbaycanın dünyanın ən dinamik şəkildə inkişaf edən ölkələrindən birinə çevrildiyini və etibarlı tərəfdaş kimi tanındığını qeyd edib, bu siyasi kurs və inkişaf prosesinin hazırda ölkə Prezidenti İlham Əliyev tərəfindən uğurla davam etdirildiyini vurğulayıb. Məhz bu siyasətin əməli nəticəsi olaraq bu gün ölkəmizdə energetika, informasiya texnologiyaları, kənd təsərrüfatı, nəqliyyat, infrastruktur, elm, təhsil, mədəniyyət, idman və digər sahələrdə əhəmiyyətli uğurların əldə edildiyi və Azərbaycanın qısa müddət ərzində dünyanın müxtəlif ölkələrinə sərmayə yatıran dövlətə çevrildiyi bildirilib.

Bununla yanaşı, Azərbaycan Respublikası Prezidentinin Sərəncamı ilə 2016-cı ilin ölkəmizdə “Multikulturalizm ili” elan edildiyi qeyd olunaraq tarixi İpək Yolu üzərində yerləşən Azərbaycanın müxtəlif sivilizasiyaların qovuşduğu məkan olaraq, əsrlər boyu milli-mədəni rəngarənglik mühitinin formalaşdığı, ayrı-ayrı millətlərin və konfessiyaların nümayəndələrinin sülh, əmin-amanlıq, qarşılıqlı anlaşma və dialoq şəraitində yaşadığı diyar kimi tanındığı, Birləşmiş Millətlər Təşkilatının Sivilizasiyalar Alyansının VII Qlobal Forumunun bu ilin aprel ayında Bakı şəhərində keçirilməsinin də dünya ölkələrinin Azərbaycandakı multikultural mühitə olan münasibətinin real ifadəsi olduğu vurğulanıb.

Ermənistan-Azərbaycan, Dağlıq Qarabağ münaqişəsi, o cümlədən əzəli və əbədi Azərbaycan torpağı olan ərazilərimizin - Dağlıq Qarabağ və onun ətrafındakı 7 rayonumuzun Ermənistan silahlı qüvvələri tərəfindən işğal olunması və bu münaqişə nəticəsində 1 milyondan artıq azərbaycanlının qaçqın və məcburi köçkünə çevrildiyi barədə məlumat verilərək münaqişə ilə bağlı BMT Təhlükəsizlik Şurasının işğalı pisləyən və işğalçı qüvvələrin Azərbaycanın işğal olunmuş ərazilərindən tam və qeyd-şərtsiz çıxarılması haqqında qəbul etdiyi dörd qətnamənin hələ də yerinə yetirilmədiyi, Ermənistan tərəfinin digər beynəlxalq təşkilatların da münaqişə ilə bağlı qəbul etdikləri qətnamə və sənədlərə məhəl qoymadığı, lakin bütün bunlara baxmayaraq Azərbaycan dövlətinin münaqişənin beynəlxalq hüququn ümumtanınmış norma və prinsipləri əsasında - ölkəmizin suverenliyi, ərazi bütövlüyü və sərhədlərinin toxunulmazlığı çərçivəsində həll olunacağına inandığı bildirilib.

Verilişdə, həmçinin Azərbaycanla Serbiya arasında münasibətlərə toxunularaq bu münasibətlərin hazırda strateji tərəfdaşlıq səviyyəsində olduğu, hələ ikinci Dünya Müharibəsi dövründə serblər ilə azərbaycanlıların antifaşist mübarizəsində birgə əməkdaşlıq etdikləri, Yuqoslaviya partizan dəstələrində kifayət qədər azərbaycanlının olduğu, 1944-cü ilin oktyabr ayında Belqradın, eləcə də Serbiyanın digər ərazilərinin faşist işğalından azad olunmasında əsasən azərbaycanlılardan təşkil olunmuş Qırmızı bayraqlı 223-cü Belqrad diviziyasının xüsusi rol oynadığı, son illərdə Azərbaycan və Serbiya arasında bütün istiqamətlərdə - siyasi, iqtisadi, mədəniyyət və humanitar sahələrdə əlaqələrin sürətlə inkişaf etdiyi, iki ölkənin liderləri də daxil olmaqla müxtəlif səviyyələrdə həyata keçirilən qarşılıqlı səfərlərin dostluq və strateji tərəfdaşlıq münasibətlərinin daha da möhkəmlənməsinə mühüm töhfəsini verdiyi bildirilib.

Verilişin ikinci hissəsində Belqrad şəhərində fəaliyyət göstərən Azərbaycan Mədəniyyət Mərkəzinin direktoru Zərifə Əlizadə, direktor müavini Lalə Məcidova və qurumun üzvü Nərgiz Məmmədova Azərbaycan Respublikasının Serbiya Respublikasındakı səfirliyinin dəstəyi ilə bu mərkəz tərəfindən həyata keçirilmiş layihələr, o cümlədən Azərbaycanın zəngin mədəniyyəti və musiqisinin, qədim tarixinin dost Serbiyada təbliğ olunması istiqamətində görülmüş işlər, təşkil olunmuş müxtəlif sərgi və konsertlər, mərkəzin bilavasitə təşəbbüs və təşkilatçılığı ilə Azərbaycanın görkəmli alim və ədiblərinin əsərlərinin serb dilinə, eləcə də Azərbaycan oxucularının tanışlığı üçün mərkəzin təşəbbüsü ilə görkəmli serb ədiblərinin əsərlərinin Azərbaycan dilinə tərcümə edildiyi və bu əsərlərin nəşr edilərək Serbiyanın və Azərbaycanın müxtəlif dövlət qurumlarına, elmi mərkəzlərinə, təhsil ocaqlarına göndərildiyi barədə məlumat veriblər. Azərbaycanda qadınların cəmiyyətdəki mühüm rolundan bəhs edilərək Heydər Əliyev Fondunun prezidenti, birinci xanım Mehriban Əliyevanın buna bariz nümunə olduğu qeyd edilib və Serbiya da daxil olmaqla Azərbaycanın müxtəlif ölkələrdə həyata keçirdiyi humanitar layihələrin əksəriyyətinin məhz Heydər Əliyev Fondunun təşəbbüsü ilə yerinə yetirildiyi bildirilib.

Veriliş zamanı tanınmış serb şairə Militsa Yeftimiyeviç Liliç tamaşaçıları Azərbaycan dilində salamlayaraq, 2015-ci ildə Bakıda keçirilmiş I Beynəlxalq Bakı Poeziya Festivalında iştirak etdiyi barədə məlumat verib, Azərbaycana səfəri çərçivəsində müşahidə etdiyi sürətli inkişaf və uğurlardan, qədimlik və müasirliyin vəhdətindən heyran qaldığını bildirib, Bakıya həsr etdiyi şerini səsləndirib, eyni zamanda, iki ölkənin yazıçılar birlikləri arasında qurulmuş yüksək səviyyəli əməkdaşlıqdan məmnunluğunu ifadə edib.

Veriliş boyu Serbiyada yaşayan həmvətənlimiz, aşpaz Anar Hüseynov tamaşaçılara milli mətbəximizin nümunələrindən olan “Şah plov”, “Kükü” və “Badımcan dolması”nın hazırlanma üsullarını nümayiş etdirib, serb müğənni İvana Muncanın rəhbərlik etdiyi NİT qrupu “Sarı gəlin” və “Laçın” Azərbaycan xalq mahnılarını canlı ifa edib, eyni zamanda, ölkəmizin uğurlarının, zəngin mədəniyyətinin, turizm potensialının və multikultural mühitinin nümayiş olunduğu videoçarxlar göstərilib.

Pərvanə Qarayeva

AZƏRTAC-ın xüsusi müxbiri

Belqrad