SƏRHƏDÇİLƏR İLƏ YEKUN VURDULAR
Martın 5-də Azərbaycan Milli Təhlükəsizlik Nazirliyi Sərhəd Qoşunlarının qərargahında ötən ilin yekunlarına həsr olunmuş müşavirə keçirilmişdir.
Müşavirəni Sərhəd Qoşunlarının komandanı, milli təhlükəsizlik nazirinin müavini general-mayor Elçin Quliyev aparırdı. Müşavirənin işində Azərbaycan Respublikasının milli təhlükəsizlik naziri general-polkovnik Namiq Abbasov iştirak edirdi.
Müşavirədə sərhəd qoşunlarının müxtəlif bölmələrinin rəhbərləri hesabat verdilər.
Sərhəd Qoşunları qərargahının rəisi general-mayor İnayət Xəlilovun hesabatında bildirildi ki, əvvəlki illərdə olduğu kimi, 2001-ci ildə də Milli Təhlükəsizlik Nazirliyinin qoşunları dövlət sərhədlərinin qorunması sahəsində gərgin fəaliyyət göstərmişlər. Azərbaycanın dövlət sərhədinin şimal və qərb hissələrinin tammiqyaslı qorunması üçün bir sıra tədbirlər görülmüş və həmin istiqamətlərdə Xudat dəstəsində 5, Zaqatala dəstəsində 6, Şəmkir dəstəsində 1 yeni sərhəd zastavası fəaliyyətə başlamışdır.
Üçüncü ölkələrin vətəndaşlarının MDB və Avropa ölkələrinə keçərkən Azərbaycan ərazisindən qanunsuz tranzit yolu kimi istifadə etmək cəhdlərinin qarşısını almaq üçün müəyyən işlər görülmüşdür. Beynəlxalq narkobiznesin öz məqsədləri üçün dövlətimizin ərazisindən tranzit kimi istifadə etmək cəhdlərinin də arası kəsilmir. Bütün bu aktual məsələlər sərhədçilərin diqqət mərkəzindədir.
Azərbaycanın milli təhlükəsizlik naziri general-polkovnik Namiq Abbasov müşavirəyə yekun vurdu.
Bölmənin digər xəbərləri
