Müstəqil Azərbaycan Respublikası Dövlət Sərhəd Xidmətinin əməkdaşları son vaxtlar yerli hakimiyyət və hüquq mühafizə orqanları ilə birlikdə narkotik maddələrin qanunsuz dövriyyəsinə, qaçaqmalçılığa qarşı mübarizə, qanunsuz silah və sursatın aşkara çıxarılması sahəsində uğurlu əməliyyatlar keçirmişlər.

Qax rayonunun Zəyəm və Lələli kəndləri ərazisində yabanı şəkildə bitən 22 ton 950 kiloqram çətənə kolu, Ağstafa rayonunun Sadıqlı, Yardımlı rayonunun Arvana, Lerik rayonunun Gilidərə kəndlərinin ərazisində isə 7300 ədəddən çox xaşxaş və çətənə kolu aşkar olunaraq məhv edilmişdir.

İran İslam Respublikasının vətəndaşları Əbdüləli İbrahimidən 67,48 qram heroin, Qulaməli Cəfərqulu Həsən oğlundan və Əlirza Abbas Rza oğlundan 40 qram tiryək aşkar edilərək götürülmüşdür.

Dövlət Sərhəd Xidmətinin əməkdaşları Dübəndi terminalı yaxınlığında, qayaların altında gizlədilmiş 20 ədəd 2A-42 markalı 30 millimetrlik top mərmisi aşkar edərək Əzizbəyov rayon polis idarəsinə təhvil vermişlər. Milli Təhlükəsizlik Nazirliyi Sumqayıt şəhər şöbəsi ilə birgə keçirilmiş əməliyyat-axtarış tədbirləri nəticəsində Mehdi Hüseynzadə adına stadionun yaxınlığından keçən su kəmərinin altında gizlədilmiş Rumıniya istehsalı olan 1 ədəd AKM avtomat silahı, 1 ədəd “LEN” markalı radiostansiya aşkar edilərək götürülmüşdür.

Saxta sənədlərlə Azərbaycandan xarici ölkələrə getmək istəyən 10 nəfər əcnəbi saxlanılmışdır. Sərhədçilər axtarışda olan 47 nəfəri və 1 nəfər fərarini saxlayaraq respublikanın hüquq mühafizə orqanlarına təhvil vermişlər. Ötən bir ay ərzində 70 nəfər sərhəd, 471 nəfər rejim pozucusu saxlanılmış, onlar barəsində qanuna uyğun tədbirlər görülmüşdür.