Səyyar monitorinq xidməti ilin birinci yarısında müqavilə öhdəliklərinə tam əməl etmişdir
Bakı, 22 iyul (AZƏRTAC). “Ekol Mühəndislik Xidmətləri” QSC-nin Ekoloji Monitorinq Departamentinin (EMD) səyyar monitorinq xidməti (SMX) ilin birinci yarısında “Azneft” İstehsalat Birliyinin (İB) “28 May”, “Neft daşları”, “Abşeronneft”, “Balaxanıneft” və N.Nərimanov adına Neft-Qazçıxarma idarələrində aparılmış monitorinq müşahidə məlumatları, ətraf mühitə təsir dərəcəsindən asılı olaraq diferensiallaşdırılmış və onların ekoloji sistemə təsirinin azaldılması məqsədi ilə konkret təkliflər hazırlayaraq sifarişçiyə təqdim etmişdir. Monitorinq zamanı istehsalat sahələrində formalaşan axıntı sularından nümunələri götürülmüş, neft məhsulları, fenollar və s. maddələr üzrə analitik təhlillər aparılması üçün EMD-nin kompleks tədqiqatlar laboratoriyasına (KTL) təqdim olunmuşdur.
SMX, həmçinin Kompleks Qazma İşləri Trestinin qazma rayonlarında monitorinq həyata keçirmişdir. Monitorinq zamanı diqqət su əsaslı şlamın atılma texnologiyasına, kimyəvi əsaslı şlamın yığılıb ətraf mühitdən təcrid edilməsi problemlərinə və buruq axıntı sularının yığılıb zərərsizləşdirilməsinə yönəldilmişdir. Bütün qazma idarələrinə monitorinqin yekunlarına dair hesabatlar hazırlanıb təqdim olunmuş və həmin hesabatlarda monitorinq rayonu üçün ekoloji tarazlığın təmin edilməsi məqsədi ilə zəruri tədbirlər əksini tapmışdır.
SMX, QSC tərəfindən “Azneft” İB-nin mədən ərazilərində həyata keçirdiyi “Neftlə çirklənmiş sahələrin bioremediasiyası” layihələri üçün zəruri olan kompleks ekoloji monitorinq işlərini də apararaq, konkret nəticələr barədə hesabatı sifarişçiyə təqdim etmişdir.
Bölmənin digər xəbərləri
