Siyasi şərhçi: Fransa Azərbaycan ərazilərində hər hansı bir addım ata bilməyəcək
Bakı, 27 dekabr, AZƏRTAC
Fransanın son hadisələrdəki fəaliyyətini ənənəvi olaraq Azərbaycan-Ermənistan münasibətlərində birdəfəlik qərəzli mövqeyin davamı kimi qiymətləndirirəm. Bu vaxta qədər Fransa müxtəlif üsullarla qeyri-qanuni şəkildə, heç bir beynəlxalq qanunvericiliyə, ölkələr arasında olan münasibətlərə uyğun gəlməyən addımlar ataraq hər cəhdlə çalışıb ki, Ermənistanın mövqeyini bir daha dəstəkləsin və Azərbaycanın öz ədalətli mübarizəsində fəaliyyətinə xələl gətirsin. Son dövrlərdə biz görürük ki, artıq Azərbaycan tərəfi birmənalı olaraq Fransanın Ermənistan-Azərbaycan münasibətlərində vasitəçi qismində iştirak etməsinin məhz bu ölkənin destruktiv fəaliyyəti nəticəsində mümkün olmadığını açıq bəyan edib. Bundan sonra Fransa müxtəlif yollarla çalışır ki, yenə də bu prosesə toxunsun. Onların əsas məqsədi vasitəçi kimi Ermənistanın əldəqayırma rəhbərliyinin vasitəsilə yenə də bu proseslərdə öz təsir imkanlarını saxlamaqdı.
Bu fikirləri AZƏRTAC-a açıqlamasında siyasi şərhçi Murad Sadəddinov bildirib.
“Amma ümumi gedişat onu göstərir ki, Azərbaycan tərəfi bəyan etdiyi prinsiplərdən heç vaxt geri çəkilməyib. Fransa rəhbərliyi, xüsusi olaraq Fransa Prezidentinin beynəlxalq aləmdə nüfuzunu itirməsinin, nəticə etibarilə Fransanın təsir imkanlarını nəinki Cənubi Qafqazda, fərqli regionlarda da itirən bir şəxsin apardığı fəaliyyətin nəticəsi onun bu məsələdən uzaqlaşdırılması ilə nəticələnməli idi”, - deyə siyasi şərhçi qeyd edib.
Onun sözlərinə görə, Qarabağda baş verən hadisələrlə əlaqədar Prezident Makron artıq bu vaxta qədər BMT-nin Təhlükəsizlik Şurasında müxtəlif vasitələrlə, imkanlarla çalışıb ki, Azərbaycana qarşı hər hansı bir qərar əldə etsin. Bu da mümkün olmayanda növbəti hədəf kimi guya Qarabağ ərazisində yaşayan ermənilərin humanitar problemləri var. Aydın məsələdir ki, orada heç bir humanitar problem yoxdur. Məsələ isə çox sadədir. Azərbaycan ekoloqları tələb edirlər ki, Qarabağ ərazisində olan yeraltı sərvətlər Azərbaycan qanunları çərçivəsində istifadə olunmalıdır. Heç kəs kənardan gəlib bu təbii sərvətləri qeyri-qanuni istismar edə bilməz. Bu tələblərin heç biri Qarabağ ərazisində yaşayan ermənilərin hər hansı humanitar problemlərlə rastlaşmasına səbəb ola bilməz.
“Azərbaycan tərəfi dəfələrlə açıq-aydın bəyan edib ki, ermənilər Laçın-Xankəndi yolundan istifadə edə, lazım olan zaman humanitar yüklərlə gəlib oradan keçə bilərlər. Amma oraya başqa dövlətlərin vətəndaşlarının müxtəlif təxribat xarakterli məqsədlər üçün gəlib keçməsinin qarşısı alınacaq, hər hansı bir silah-sursatın, minaların gəlib keçməsinə imkan yaradılmayacaq. Bu yol ancaq humanitar məqsədlər üçün istifadə ediləcək. Bunun sübutu kimi, humanitar yüklərin keçirilməsinə şərait yaradıldığını dəfələrlə görmüşük”, - deyə M.Sadəddinov diqqətə çatdırıb.
Siyasi şərhçi bildirib ki, Fransa Prezidentinin atdığı addımlar heç bir nəticə verməyəcək. Fransa Prezidenti bir daha anlamalıdır ki, Fransa Azərbaycan ərazilərində hər hansı bir addım ata bilməyəcək. Eyni zamanda, Fransa ölkəmizin tələblərini nəzərə almasa, Azərbaycan-Ermənistan münasibətlərinin gələcəkdə inkişafında vasitəçiliyi həyata keçirə bilməyəcək.
Bölmənin digər xəbərləri
