SOCAR-ın ekologiya idarəsində “Beynəlxalq Yer günü” qeyd edilib
Bakı, 23 aprel, AZƏRTAC
Azərbaycan Respublikası Dövlət Neft Şirkətinin (SOCAR) ekologiya idarəsi Azərbaycan Uşaq və Gənclərin Sülh Şəbəkəsi Liderlik Məktəbinin üzvləri ilə birlikdə Eko-parkda “Beynəlxalq Yer günü”nü qeyd edib.
SOCAR-ın mətbuat xidmətindən AZƏRTAC-a verilən məlumata görə, Eko-mərkəzdə təhlükəsizlik təlimatı ilə tanışlıqdan sonra tədbir iştirakçılarına “Beynəlxalq Yer günü” haqqında, Ermənistanın işğalçı siyasəti nəticəsində Azərbaycan ərazilərində həyata keçirilmiş ekoloji terror haqda statistik rəqəmlər açıqlanıb, Liderlik Məktəbinin hazırladığı film nümayiş olunub. Sonra tədbir “Gəlin müharibəsiz Yer Kürəsi naminə çalışaq” adlı sərginin və uşaqların hazırladığı ekoloji modellərin nümayişi ilə davam etdirilib.
“22 aprel-Beynəlxalq Yer günü”nün keçirilmə ənənəsi ХIХ əsrin 40-cı illərindən başlayır. 1882-ci il aprelin 22-də ABŞ-ın Nebraska ştatında rəsmi olaraq bayram günü elan edilərək “Ağac günü” kimi qeyd olunmağa başlamış, 1970-ci ildən sonra isə ekoloji problemlərə, ətraf mühitin çirklənməsinə, təbiətin əhəmiyyətinə diqqəti artırmaq məqsədilə həmin günün adı dəyişdirilərək “Beynəlxalq Yer günü” adlandırılmışdır. 2009-cu ildə BMT-nin Baş Assambleyası tərəfindən qəbul olunmuş qətnaməyə əsasən “Yer Günü” hər il aprelin 22-də 192 ölkədə qeyd olunur.
Bölmənin digər xəbərləri
