SOFİYADA ATƏT-İN NAZİRLƏR ŞURASININ İCLASI BAŞLANMIŞDIR
Dekabrın 6-da Sofiyada ATƏT-in Nazirlər Şurasının 12-ci iclası öz işinə başlamışdır. Azərbaycan nümayəndə heyətinə xarici işlər naziri Elmar Məmmədyarov başçılıq edir.
XİN-in mətbuat mərkəzindən AZƏRTAC-a bildirmişlər ki, iclas ərəfəsində, dekabrın 5-də ATƏT-in Minsk qrupu həmsədrlərinin iştirakı ilə Sofiyada Azərbaycan və Ermənistan xarici işlər nazirlərinin görüşü keçirilmişdir. Görüşdə Ermənistan-Azərbaycan, Dağlıq Qarabağ münaqişəsinin həllinə dair bir sıra məsələlər müzakirə edilmiş, ən yaxın gələcəkdə danışıqlar prosesinin fəal və səmərəli şəkildə davam etdirilməsinin vacibliyi xüsusi vurğulanmışdır. Bundan çıxış edərək, NATO-nun Avratlantik Tərəfdaşlıq Şurasının bu il dekabrın 9-da Brüsseldə keçiriləcək nazirlər görüşündə Azərbaycan və Ermənistan xarici işlər nazirlərinin Praqa görüşləri formatında növbəti raunda dair razılıq əldə olunmuşdur. Azərbaycan tərəfinin təşəbbüsü ilə nazirlərin Sofiya görüşündə işğal olunmuş ərazilərdə aparılan qeyri-qanuni məskunlaşdırma ilə bağlı bölgəyə ATƏT-in fakt araşdırıcı missiyasının göndərilməsi məsələsi də müzakirə edilmişdir.
ATƏT-in Nazirlər Şurasının 12-ci iclasının ilk günündə xarici işlər naziri Elmar Məmmədyarov öz çıxışında əsas diqqəti Ermənistan-Azərbaycan, Dağlıq Qarabağ münaqişəsinə yönəltmişdir. Çıxışda qeyd olunmuşdur ki, Azərbaycan Respublikasının Dağlıq Qarabağ bölgəsini və ətraf rayonlarını işğal etmiş Ermənistan, hərbi təcavüzünün nəticələrini möhkəmləndirməyə can ataraq, Azərbaycanın işğal olunmuş ərazilərində fəal şəkildə məskunlaşdırma siyasəti aparır, bu isə beynəlxalq hümanitar hüququn ciddi şəkildə pozulması deməkdir və xüsusilə də 1949-cu il Cenevrə Konvensiyası ilə tam ziddiyyət təşkil edir. Həmçinin bildirilmişdir ki, Azərbaycan beynəlxalq hüququn prinsip və normaları, BMT Təhlükəsizlik Şurasının müvafiq qətnamələri, ATƏT-in aidiyyəti sənədləri əsasında münaqişənin sülh yolu ilə həll olunmasına sadiqdir. Qeyd olunmuşdur ki, Azərbaycan Ermənistanla münasibətlərin normallaşdırılmasına hazırdır, lakin bununla bağlı Ermənistan zor gücü ilə əldə olunmuş reallıqlar, habelə ərazi iddiaları ideologiyasından deyil, beynəlxalq hüquq və demokratiya prinsiplərindən çıxış etməlidir. Praqa görüşlərini müsbət qiymətləndirərək, Azərbaycan danışıqlar prosesinə ciddi xələl gətirən işğal olunmuş ərazilərdə aparılan qeyri-qanuni fəaliyyətə dair narahatlığını bildirmiş və ATƏT-i məsələnin həll olunmasında öz töhfəsini verməsinə çağırmışdır.
İclas çərçivəsində nazir E.Məmmədyarov, həmçinin Avropa Birliyinin xarici əlaqələr və Avropa qonşuluğuna dair siyasət üzrə komissarı xanım Benita Ferrero-Valdner, ATƏT-in Demokratik Təsisatlar və İnsan Hüquqları Bürosunun direktoru Kristian Stroqal, ATƏT-in hazırkı sədrinin Ermənistan-Azərbaycan münaqişəsi üzrə xüsusi nümayəndəsi Filip Dmitrov, habelə Türkiyə, Belçika, Avstriya və Yunanıstanın nümayəndə heyətlərinin başçıları ilə ikitərəfli görüşlər keçirmişdir.
ATƏT-in Nazirlər Şurasının 12-ci iclası dekabrın 7-də başa çatacaqdır.
Bölmənin digər xəbərləri
