MƏDƏNİYYƏT
Son on ildə respublikamızda turizm sahəsində mühüm addımlar atılmışdır
Bakı, 11 aprel (AZƏRTAC). Son 10 ildə respublikamızda turizm sahəsində mühüm addımlar atılmış, nailiyyətlər əldə olunmuşdur. Turizm sənayesinin inkişafı, onun infrastrukturunun əsas amillərindən olan mehmanxanaların sayının artması ölkəmizdə bu sahənin müsbət inkişafından xəbər verir.
AZƏRTAC xəbər verir ki, bu sözləri XI Azərbaycan Beynəlxalq Turizm və Səyahətlər Sərgisinin (AİTF) başlanmasına həsr olunmuş mətbuat konfransında Mədəniyyət və Turizm Nazirliyinin turizm şöbəsinin müdiri Aydın İsmiyev söyləmişdir. O demişdir ki, Mədəniyyət və Turizm Nazirliyinin dəstəyi ilə aprelin 12-dən 14-dək Bakıda keçiriləcək ənənəvi AİTF Beynəlxalq sərgisi turizm sahəsinin mütəxəssisləri üçün illik görüş yerinə çevrilməklə yanaşı, regionun bu sahədə əhəmiyyətli tədbirləri kimi qiymətləndirilir.
Artıq ənənə halını almış bu sərgi çərçivəsində görüşlər keçirilir, əməkdaşlıq müqavilələri imzalanır, turizmlə bağlı yeni proqramlar, qiymətlər barədə məlumatlar açıqlanır. Sərgi, həmçinin Dünya Turizm Təşkilatı, Azərbaycanda İxracın və İnvestisiyaların Təşviqi Fondu (AZPROMO), Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK) və Beynəlxalq Turizm Sərgiləri Assosiasiyası tərəfindən də dəstəklənir.
Əgər bu tədbirin ilk dəfə başlandığı 2001-ci ildə sərgidə cəmi 5 ölkədən 20 şirkət iştirak etmişdisə, aprelin 12-də açılacaq növbəti sərgiyə dünyanın 32 ölkəsinin 200 şirkət və təşkilatının qatılacağı gözlənilir.
Aydın İsmiyev diqqətə çatdırmışdır ki, Azərbaycan ekspozisiyası sərgidə son illərdə ölkəmizdə bu sahədə baş vermiş müsbət inkişaf dinamikasını əks etdirəcəkdir. Nazirliyin stendi milli motivlərlə zəngin olacaq və Azərbaycanın bütün dünyada məşhur olan qonaqpərvərliyini əks etdirəcəkdir.
Mətbuat konfransında “İteca Kaspian” şirkətinin direktor müavini Bəhruz Hidayətzadə nəzərə çatdırmışdır ki, sərginin təşkilatçıları təmsil etdiyi qurum və Böyük Britaniyanın “ITE Group plc” şirkətidir. Buraya “İTE Group plc” şirkətinin dünya üzrə tərəfdaş və agentlərindən ibarət geniş şəbəkəsi cəlb olunmuşdur. Tərəfdaşlar qismində “Azərbaycan Hava Yolları” Qapalı Səhmdar Cəmiyyəti, “Hilton Baku” və “Qafqaz Point” otelləri və “Greenwich Travel Club” şirkəti kimi çıxış edəcəklər. Həmçinin Abşeron zonasının otellər şəbəkəsi, “Fairmont”, “Four Seasons”, “Park İnn” otelləri təqdim olunacaqdır.
Bildirilmişdir ki, bu il sərgi Azərbaycan, Bolqarıstan, Gürcüstan, Rusiya Federasiyasının Dağıstan Respublikası, Hindistan, Kipr, Ukraynanın Krım Muxtar Respublikası, Litva, Malayziya, Sloveniya, Türkiyə, Çexiya, Dubay Əmirliyi, Rusiyanın Stavropol diyarı və Xorvatiyanın 15 milli və regional ekspozisiyanı qəbul edəcəkdir. İştirakçılar burada qonaq kimi iştirak edən Bolqarıstanın kurort və müalicəvi istirahətinin bütün özəl xüsusiyyətlərini əks etdirən stendlərlə tanış olacaqlar.
Konfransda Türkiyənin Azərbaycandakı səfirliyinin mədəniyyət və tanıtma müşaviri Seyid Əhməd Arslan artıq üçüncü ildir ki, keçirilən sərginin işinə uğurlar arzulamış və ölkəsinin mötəbər tədbirdə iştirakından şərəf duyduğunu qeyd etmişdir. Vurğulamışdır ki, Türkiyə bütün sahələrdə olduğu kimi, turizm sahəsində də qardaş ölkə ilə əməkdaşlıq edir. Türkiyə AİTF Beynəlxalq sərgisinin tərəfdaş ölkəsi kimi çıxış edir və öz milli stendində 16 aparıcı turizm şirkətini təqdim edəcəkdir. Azərbaycanın əlverişli, coğrafi mövqeyi, tarixi, iqlimi, zəngin mədəniyyəti turistlərin buraya səfər etməsinə yol açır və Türkiyə turizmdə qazandığı təcrübəni qardaş ölkə ilə bölüşməyə hər zaman hazırdır.
“İteca Kaspian” şirkətinin layihə rəhbəri Xəyal Əliyeva bildirmişdir ki, sərgi çərçivəsində VI Qafqaz Beynəlxalq mehmanxana, restoran və supermarketlər üçün avadanlıq və ləvazimatlar (Horex) ixtisaslaşmış sərgisi də keçiriləcəkdir. Burada İtaliya, Almaniya, Rusiya, Türkiyə və Fransadan olan şirkətlər mehmanxana, restoran və otellər üçün peşəkar mətbəx və camaşırxana avadanlığı, məişət kimyası, parçalar və eksklüziv qab-qacaq, otellər üçün “onlayn” bron etmə və ödəniş sistemləri kimi informasiya texnologiyaları və s. təqdim edəcəklər.
Qeyd edilmişdir ki, sərginin işgüzar proqramla müşayiət olunması ənənəyə çevrilmişdir. Buraya gələn sənaye peşəkarları “Qatar Airways”, Tailandın turizm idarəsinin nümayəndəliyi, Polşa, Slovakiya, Macarıstan və Çexiyaya turlar təqdim edən Vişeqrad qrupu tərəfindən təşkil olunan seminarlarda iştirak etmək imkanı qazanacaqlar.
Hər il AİTF-in iştirakçılarının siyahısına yeni ölkələr əlavə olunur. Bu il Qətər, Polşa, Vyetnam, Slovakiya, Xorvatiya sərginin debütant ölkələridir. İştirakçılar arasında dünyanın aparıcı aviaşirkətləri də vardır. “Azərbaycan Hava Yolları” Qapalı Səhmdar Cəmiyyəti, ”AirAstana”, “AirBaltic”, “flyubai”, Çex Hava Yolları və “Turkish Airline” şirkəti xüsusi təkliflərini elan edəcəkdir. Nümayiş olunan ekspozisiyanın bir hissəsi sağlamlıq mərkəzləri və sanatoriyalara həsr olunacaqdır.
Sonda jurnalistlərin sualları cavablandırılmışdır.