SİYASƏT
Sonuncu Əfv Sərəncamı yüksək humanizm və siyasi plüralizm nümunəsidir - Ekspert
Bakı, 9 may, AZƏRTAC
Prezident İlham Əliyevin mayın 8-də imzaladığı Sərəncam Azərbaycanın müstəqilliyi dövründə tətbiq edilmiş ən böyük əfv aktıdır. Sərəncama əsasən, 801 nəfər məhkum əfv edildi. Amma bu əfv aktının möhtəşəmliyi təkcə statistik göstəriciləri ilə bağlı deyil. Mayın 8-də imzalanan Sərəncam iki böyük tarixi hadisə ilə simvolizə edilir ki, bu da ona əlavə rəng qatır.
Birinci fakt odur ki, indiki Əfv Sərəncamı Azərbaycanın müstəqil dövlətinin qurucusu, Azərbaycan xalqının Ümummilli Lideri Heydər Əliyevin 100 illik yubileyinə həsr edildi. Ulu Öndər Heydər Əliyev ölkəmizin yeni tarixində ən çox iz qoymuş şəxsiyyətdir. Azərbaycanın müstəqilliyinin əldə edilməsi, möhkəmləndirilməsi, onun iqtisadi, siyasi, hərbi dayaqlarının yaradılması, beynəlxalq aləmdə tanıdılması Ulu Öndər Heydər Əliyevin xidmətlərinin və əsasını qoyduğu siyasi xəttin nəticəsidir. Azərbaycanın müasir tarixində elə bir hadisə yoxdur ki, onun barəsində danışarkən Heydər Əliyevin adı çəkilməsin. Hər bir milli prosesin kökü onun adı ilə bağlıdır. Sonuncu Əfv Sərəncamının da Heydər Əliyevin anadan olmasının 100 illiyinə həsr edilməsi Ulu Öndərin xatirəsinin əbədiləşdirilməsi üçün uyğun addımdır.
Bu fikirləri AZƏRTAC-a açıqlamasında Mətbuat Şurası İdarə Heyətinin üzvü, media eksperti Müşfiq Ələsgərli söyləyib.
M.Ələsgərli deyib: “Qeyd etmək zəruridir ki, Heydər Əliyev bütün dövrlərdə humanizm məfkurəsindən çıxış edərək, mərhəmət və insanpərvərlik kimi ən ali keyfiyyətləri əldə rəhbər tutub. Ulu Öndərin humanizm ideyalarına böyük önəm verməsi və real həyatda bunu təcəssüm etdirən addımlar atması vətəndaş həmrəyliyinə xidmət etməklə yanaşı, insanların hakimiyyətə olan etimadını daha da artırıb. Ümummilli Lider Heydər Əliyevin həyata keçirdiyi dövlət siyasətinin mahiyyətini özündə əks etdirən humanistliyin nəticəsində əfv və amnistiya təsisatları yaradılıb,1995-2003-cü illərdə 7 amnistiya aktı və 32 əfv fərmanı qəbul edilib. Bu amnistiya aktları 77 mindən çox insana şamil edilib, bunlardan 21 min 325 nəfəri cəzasının çəkilməmiş hissəsindən azad olunub. Ulu Öndər tərəfindən imzalanan əfv fərmanları ilə 3 mindən artıq şəxs bağışlanaraq cəzalarından azad edilib. Heydər Əliyev böyük humanistlik nümayiş etdirərək imzaladığı əfv fərmanları ilə 1994-1995-ci illərdə dövlət çevrilişi cəhdlərində iştirak edən insanların da bir qismini bağışlanıb. Ümummilli Liderin humanizm, insanpərvərlik ruhlu siyasəti Prezident İlham Əliyev tərəfindən də davam etdirilir. Bu kontekstdə yanaşanda Əfv Sərəncamı həm Heydər Əliyevin humanizm siyasətinin davam etdirildiyini, onun humanizminə hörmətlə yanaşıldığını ifadə edir”.
Ekspert əlavə edib ki, sonuncu Sərəncamın əlamətdar tərəflərindən biri də onun həbsdə olan siyasi müxalifət təmsilçilərini, bir sıra keçmiş məmurları və güc strukturlarının nümayəndələrini də əhatə etməsidir. Belə yanaşma sonuncu Əfv Sərəncamını həm də siyasi plüralizm nümunəsinə çevirir.
Sərəncamın ikinci simvolik mənası isə onun mayın 8-də - Şuşanın işğal günündə imzalanmasıdır. Prezident İlham Əliyevin Şuşaya xüsusi qayğı və həssaslıqla yanaşdığı bəllidir. Müzəffər Ali Baş Komandan Şuşanın düşmən işğalından azad edilməsi üçün şəxsi iradə və qətiyyət göstərdiyini hər birimiz xatırlayırıq. Şuşanın azadlıq xəbərinin 2020-ci ilin məhz noyabrın 8-də elan olunması da simvolik məna kəsb edirdi. Ayların 8-i tarixi artıq məğlubiyyət günü deyil, azadlıq, qələbə günü kimi yaddaşlara həkk edilir. Bu kontekstdə yanaşsaq, Əfv Sərəncamı üçün də mayın 8-nin seçilməsinin təsadüfi olmadığını görərik. Prezident İlham Əliyev Azərbaycan xalqında qələbə, azadlıq, qalibiyyət ovqatı formalaşdırır ki, bu da mühüm əhəmiyyətə, tarixi dəyərə malikdir.