Sorğu: Böyük Britaniyada gənclərin 50 faizi müharibədə iştirak etməyə hazır deyil
London, 22 aprel, AZƏRTAC
Böyük Britaniyada aparılan sorğu göstərib ki, gənclərin yarısı ölkələri uğrunda müharibədə iştirak etmək istəmirlər.
AZƏRTAC “Reuters”ə istinadla xəbər verir ki, Qlazqo Universiteti nəzdində fəaliyyət göstərən Con Smit Mərkəzinin sifarişi ilə keçirilən və 16–29 yaşarası 2 min nəfəri əhatə edən sorğuya görə, respondentlərin 50 faizi heç vaxt silaha sarılmayacaqlarını deyib. Yalnız 38 faizi müəyyən hallarda bunu edə biləcəklərini qeyd edib. Avropa uğrunda döyüşmək məsələsində isə bu göstərici 32 faizə düşür.
Sorğunun nəticələrinə əsasən, gənclər arasında qlobal münaqişələrə münasibətdə ehtiyatlı beynəlmiləlçilik yanaşması müşahidə olunur. Respondentlər müasir müharibələri çox vaxt mənasız və ya siyasi motivli hesab etdiklərini bildiriblər. Eyni zamanda, gənclərin həyat səviyyəsi ilə bağlı gözləntilərində də ciddi dəyişiklik qeydə alınıb. Belə ki, valideynlərindən daha yaxşı həyat yaşayacaqlarına inananların sayı bir il ərzində 63 faizdən 36 faizə enib. Sorğu, həmçinin göstərir ki, bir çox gənc qlobal münaqişələrdən daha çox yaşayış xərcləri kimi problemlərin həllinə üstünlük verir.
Bölmənin digər xəbərləri
