İDMAN
SUMQAYIT İDMANÇILARININ UĞURLARI QİYMƏTLƏNDİRİLDİ
Sumqayıt idmançıları - boks üzrə beş dəfə Azərbaycan çempionu Şahin İmranov, yunan-roma güləşi üzrə dünya birinciliyinin bürünc mükafatçısı Nurəddin Rəcəbli, ağır atletika üzrə dəfələrlə Azərbaycan çempionu Elçin Əliyev, cüdo üzrə dünya çempionatının bürünc mükafatçısı Elxan Rəcəbli və yunan-roma güləşi üzrə dünya birinciliyinin qalibi Arif Mehrəliyev şəhər bələdiyyəsinin təqaüdçüləri oldular. Bələdiyyə idarəsinin qərarı ilə 2004-cü ilin dekabr ayınadək onlara hər ay xüsusi təqaüd veriləcəkdir.
Birinci təqaüdün təntənəli surətdə təqdim olunması mərasimində Sumqayıt bələdiyyəsinin sədri Zakir Fərəcov qeyd etdi ki, 4 idman məktəbində hər il 7 min yeniyetmə və gəncin idmanın 22 növü ilə məşğul olduğu bu şəhər bir neçə parlaq idmançı nəsli yetişdirmişdir. Təkcə ötən il onlar müxtəlif səviyyəli yarışlarda iştirak edərək 105 qızıl, 83 gümüş, 86 bürünc medala layiq görülmüşlər. Bu medalların əsas hissəsi idmanın olimpiya növlərində qazanılmışdır. Natiq Azərbaycan Prezidenti Heydər Əliyevin gənclərə, o cümlədən idmana diqqətini və qayğısını xüsusi vurğuladı. Eyni zamanda bildirdi ki, Sumqayıt idmançıları beynəlxalq yarışlarda belə yüksək nəticələrə nail olmaları ilə ilk növbədə Azərbaycan gənclərinin tanınmış lideri, Milli Məclisin deputatı, Milli Olimpiya Komitəsinin sədri İlham Əliyevə minnətdardırlar.