SUMQAYIT KİMYAÇILARI İMƏCİLİK KEÇİRMİŞLƏR
Sumqayıt, 17 aprel (AZƏRTAC). Aprelin 17-də səhər tezdən Bakı -Quba avtomagistralı istiqamətində Sumqayıtla Hacı Zeynalabdin Tağıyev qəsəbəsi arasındakı sahədə xüsusi qələbəlik vardı. “Azərikimya” dövlət şirkətinin Sumqayıtda yerləşən beş müəssisəsinin və şəhər təsərrüfatı idarəsinin əməkdaşları ümumi iməciliyə çıxmışdı. Dövlət şirkətinin bir neçə zavodunun ərazisi boyunca keçən üç kilometrlik zolağın yaşıllaşdırılması ilə əlaqədar bu tədbir ölkə Prezidenti İlham Əliyevin elan etdiyi “Ekologiya ili” çərçivəsində həyata keçirilmişdir.
Tədbirin təşkilatçıları əvvəlcədən hazırlıq görmüş və iməcilik iştirakçılarının səmərəli işləyə bilməsi üçün hər cür şərait yaratmışdılar. Tinglər əkmək üçün torpaq əvvəlcədən bellənib hazırlanmışdı. Dərinliyi bir metrə yaxın olan çalalara tinglər əkildikdən sonra onların dibinə gübrələnmiş qum səpilmişdir. Ağacların əkilməsi üçün də müvafiq ölçülü çalalar qazılmış, suvarma üçün şərait yaradılmışdır. Tinglərin əyilməməsi üçün onların yanına basdırılmış taxta tirlər onları küləkdən qorumağa kömək edəcəkdir. Ərazinin yaşıllaşdırılması ilə yanaşı abadlıq işləri də aparılmışdır. Fəhlələr üç kilometr uzunluğunda daş hasara mala çəkmişlər. Sonra həmin hasar rənglənəcəkdir.
İməcilikdə dörd mindən artıq Eldar şamı, sərv, xurma və zeytun tingi əkilmişdir. Burada səyyar bufetlər də işləyirdi. İməcilik iştirakçıları yaxşıca işləyəndən sonra təzə çay içib şirniyyat yemək və söhbət etmək imkanına malik idi. İməcilikdə fəhlələrlə yanaşı Dövlət Neft Şirkətinin vitse-prezidenti Muxtar Babayev və Sumqayıt İcra Hakimiyyətinin rəhbərləri iştirak etmişdir.
Xatırladaq ki, yaxın günlərdə dövlət başçısının sərəncamı ilə “Azərikimya” dövlət şirkəti Azərbaycan Respublikası Dövlət Neft Şirkətinin tabeliyinə verilmişdir.
######
Bölmənin digər xəbərləri
