Sumqayıt regional vəkil bürosu “Hüquqi Yardım Mərkəzi” layihəsinin icrasına başlayır
Bakı, 1 sentyabr, AZƏRTAC
Sumqayıt regional vəkil bürosu “Hüquqi Yardım Mərkəzi” layihəsinin icrasına başlayır.
Vəkillər Kollegiyasından AZƏRTAC-a bildiriblər ki, layihənin məqsədi gənc hüquqşünaslara və hüquqşünas tələbələrə vəkillik peşəsinin vərdişlərinin öyrədilməsi və əhalinin aztəminatlı təbəqələrinə pulsuz hüquqi yardımın göstərilməsidir.
Layihəyə 5 nəfər gənc hüquqşünas və ya hüquqşünas tələbə (könüllü hüquqşünas) cəlb olunur. Onların seçimində gələcəkdə vəkil olmaq istəyənlərə üstünlük verilir. Könüllü hüquqşünaslar büronun vəkillərinin nəzarəti ilə əhalinin aztəminatlı təbəqələrinə pulsuz hüquqi yardım (məsləhətlərin verilməsi, ərizə, şikayətlərin hazırlanması) göstərir, növbəlilik qaydasında büronun vəkillərinin iştirak etdikləri məhkəmə iclaslarına qatılırlar.
Gələcəkdə vəkil olmağı arzulayanlar və ilkin peşə vərdişlərinə yiyələnmək, təcrübə qazanmaq istəyənlərdən öz CV-lərini sentyabrın 20-dən gec olmayaraq [email protected] ünvanına göndərmələri və ya şəxsən büroya təqdim etmələri xahiş olunur.
Ünvan: Sumqayıt şəhəri, 9-cu mikrorayon, Zülfü Hacıyev küçəsi 226, telefon: +994 18 656 22 11, e-mail: [email protected] .
Bölmənin digər xəbərləri
