Sumqayıtda ötən il üç mindən çox ictimai iş yeri açılıb
Sumqayıt, 3 mart, Ətrabə Rzayeva, AZƏRTAC
Sumqayıt Şəhər Məşğulluq Mərkəzi ötən il ərzində 9 min 753 sakini işaxtaran kimi qeydiyyata alıb. Aparılan məqsədyönlü tədbirlər nəticəsində 6 min 417 nəfər işlə təmin olunub.
Şəhər Məşğulluq Mərkəzindən AZƏRTAC-a bildirilib ki, əhalinin məşğulluq imkanlarının genişləndirilməsi, əmək bazarında aktivliyin artırılması məqsədilə ölkə rəhbərinin tapşırığına əsasən Sumqayıtda 3 min 90 haqqı ödənilən ictimai iş yeri açılıb, 106 nəfərə işsizlikdən sığorta ödənişi təyin edilib, 360 nəfər özünüməşğulluq proqramının təlimlərinə cəlb olunub. Ümumilikdə 2019-cu ildə 6 min 910 yeni iş yeri açılıb.
Ölkə başçısının imzaladığı sosialyönümlü fərman və sərəncamlarla əhalinin rifah halının yaxşılaşdırılması və sosial müdafiəsinin gücləndirilməsi məqsədilə görülən tədbirlər bu sahədə geniş islahatlardan xəbər verir.
Dövlət Sosial Müdafiə Fondu üzrə gəlirlər 15 milyon manat artaraq 162 milyon manat təşkil edib. Xərclər isə 6 milyon manat çoxalaraq 149 milyon manata çatıb. Şəhərdə qeydiyyatda olan 49 min 757 pensiyaçıya xidmət göstərilib, şəhər üzrə əmək pensiyalarının orta aylıq məbləği 243 manat olub.
Bölmənin digər xəbərləri
