Süni intellekt və dronlarlardan istifadə neft infrastrukturunun monitorinqinin səmərəliliyini artırır – ŞƏRH
Bakı, 21 iyun, AZƏRTAC
Dübəndi çimərliyində baş verən hadisələrə bənzər hadisələrin qarşısını almaq və onlara vaxtında reaksiya vermək üçün daimi monitorinq və müasir nəzarət texnologiyalarının tətbiqi zəruridir.
Bu fikri Azərbaycan Dövlət İqtisad Universitetinin İqtisadiyyat kafedrasının dosenti, iqtisadiyyat üzrə fəlsəfə doktoru Emin Qəribli Pirallahı adası ilə Dübəndi kəndi arasındakı sularda neft dağılması ilə bağlı vəziyyəti AZƏRTAC-a şərh edərkən bildirib.
“Bütövlükdə, ekoloji riskləri minimuma endirmək üçün belə operativ reaksiyanın nə qədər vacib olduğunu və SOCAR-ın müvafiq tədbirlər gördüyünü də bilirik. Biz onu da bilirik ki, vaxtaşırı monitorinq aparılır və sistem işləyir. Lakin Bakı indi turizm bölgəsinə çevrildiyindən, dünyada rəqəmsallaşma və monitorinqə keçid prosesi getdiyindən, düşünürəm ki, süni intellekt və pilotsuz uçuş aparatlarından istifadə son dərəcə vacibdir. Ona görə ki, bu, bizə daha sürətli cavab tədbirləri görməyə imkan verəcək”, - deyə ekspert qeyd edib.
Onun sözlərinə görə, rəqəmsal həllərin və müasir müşahidə vasitələrinin istifadəsi potensial risklərin daha səmərəli şəkildə müəyyən edilməsinə və lazımi tədbirlərin vaxtında görülməsinə imkan verir.
Agentliyin həmsöhbəti bu cür hadisələrin mümkün nəticələrindən danışarkən, əhəmiyyətli iqtisadi itkilər gözləmədiyini vurğulayıb. Eyni zamanda, o, oxşar hadisələrin dünyada, xüsusən də ABŞ-də və digər inkişaf etmiş ölkələrdə vaxtaşırı baş verdiyinə və bu cür vəziyyətlərdə təcili reaksiya, nəticələrin lokallaşdırılması və ətraf mühitə dəyən potensial ziyanın azaldılması üçün müasir texnoloji vasitələrdən istifadənin vacib olduğuna diqqət çəkib.
“Xüsusi böyük iqtisadi itkilər olmayacaq. Müəyyən ekoloji itkilər ola bilər, amma yenə də təkrar edirəm, müasir texnologiyaların köməyi ilə biz zərəri minimuma endirməyə çalışacağıq”, - deyə E.Qəribli bildirib.
Müəllif – Pərvanə Qafarova
Bölmənin digər xəbərləri
