Suraxanı rayonundakı mədən ərazisində 1500-dən çox ağac əkilmişdir
Bakı, 14 aprel (AZƏRTAC). Suraxanı Rayon İcra Hakimiyyəti tərəfindən ətraf mühitin yaşıllıq zonasına çevrilməsi, vətəndaşların sağlam həyatının təmin olunması məqsədi ilə rayonun bütün qəsəbələrində vaxtaşırı ağacəkmə kampaniyaları keçirilir. Son dövrdə rayonda 10 mindən yuxarı ağac əkilmişdir.
Rayon icra hakimiyyətindən AZƏRTAC-a bildirmişlər ki, növbəti ağacəkmə kampaniyası Heydər Əliyev prospektindən “Atəşgah məbədi” Dövlət Tarix-Memarlıq Qoruğuna gedən yolun kənarındakı mədən ərazisində keçirilmişdir.
Budəfəki kampaniyada rayonda fəaliyyət göstərən idarə və müəssisələrin işçiləri və sakinlər mədən ərazisində 1500-dən çox ağac əkmişlər. Bundan əlavə, ətraf ərazilər məişət tullantılarından təmizlənmiş, texnika ilə hamarlanmışdır. Eyni zamanda, yol kənarında təmizlik və abadlıq işləri aparılmışdır. Əkilən ağaclara qulluq göstərilməsi üçün zəruri tədbirlərin görülməsi nəzərdə tutulmuşdur.
Rayonun ekoloji durumunun yaxşılaşdırılması işləri davam etdirilir.
Bölmənin digər xəbərləri
