Suriya dağıdılmış avtomobil yollarının bərpası üçün beynəlxalq tender elan edib
Bakı, 14 iyul, AZƏRTAC
Suriya ölkənin dağıdılmış beynəlxalq avtomobil yolları şəbəkəsinin təkmilləşdirilməsinə yönəlmiş strateji yol bərpa layihələri üçün yeddi daxili və beynəlxalq tender elan edib. AZƏRTAC SANA agentliyinə istinadla xəbər verir ki, bu barədə Suriyanın nəqliyyat naziri Yarub Bədr çərşənbə axşamı bildirib.
Dəməşqdə keçirilən mətbuat konfransında çıxış edən Bədr bildirib ki, layihələrə Nəssib-Dəməşq, Dəməşq-Homs və Homs-Hələb avtomobil yollarının, həmçinin şimalda Türkiyə sərhədini cənubda İordaniya sərhədi ilə birləşdirən M5 dəhlizini təşkil edən Sərəkib-İdlib bağlantısının bərpası daxildir.
Nazirlik, həmçinin Dəməşq-Palmira yolunda ikinci yol hissəsinin tikintisi və Palmira-Deyr Əz-Zor avtomobil yolunun ikiqat yol hissəsinə çevrilməsi üçün iki layihə elan edib. Həm bərpa işlərinə, həm də yeni yolların tikintisinə nəzarət etmək üçün beynəlxalq məsləhətçi firmalar üçün ayrıca tenderlər elan edilib.
Bədr beynəlxalq şirkətlərin cəlbinin ən yüksək texniki standartları təmin etmək və layihələrin həyata keçirilməsi, onlara nəzarət sahəsində qlobal təcrübədən faydalanmaq məqsədi daşıdığını bildirib.
Suriya yol nəqliyyatı Baş müəssisəsinin direktoru Muaz Nəccar isə bildirib ki, layihələr çərçivəsində Suriyanın yol şəbəkəsi ölkənin strateji coğrafi mövqeyinə uyğun olaraq modernləşdiriləcək.
Bölmənin digər xəbərləri
