Tallin şəhərində Xocalı soyqırımı ilə bağlı rəsm sərgisi təşkil edilib
Bakı, 26 fevral, AZƏRTAC
Estoniyanın Tallin şəhərində Xocalı soyqırımının 30-cu ildönümü ilə əlaqədar azərbaycanlı rəssam Rövşən Quliyevin (Nur) fərdi rəsm sərgisi keçirilib.
Diasporla İş üzrə Dövlət Komitəsindən AZƏRTAC-a bildiriblər ki, Komitənin dəstəyi və “Buta Art Studio” Azərbaycan Yaradıcılıq Mərkəzinin təşkilatçılığı ilə baş tutan sərgidə əvvəlcə Xocalı soyqırımı qurbanlarının əziz xatirəsi bir dəqiqəlik sükutla yad edilib.
Sərginin açılış mərasimində çıxış edənlər 1992-ci il fevralın 25-dən 26-na keçən gecə Ermənistan silahlı qüvvələrinin sovet ordusunun Xankəndidə yerləşən 366-cı motoatıcı alayının iştirakı ilə beynəlxalq hüquq normalarını və prinsiplərini pozaraq, Xocalı şəhərini işğal etdiyi, məhz azərbaycanlı olduqlarına görə dinc və günahsız əhaliyə qarşı misli görünməmiş qəddarlıqla soyqırımı törətdiyi barədə ətraflı məlumat veriblər. Xalqımızın bu soyqırımını unutmadığı və unutdurmayacağı vurğulanıb.
Sonra Xocalı soyqırımı qurbanlarının xatirəsinə ithaf edilmiş rəsm sərgisinə baxış olub.
Sərgi martın 5-dək davam edəcək.
Bölmənin digər xəbərləri
