Bakı, 4 noyabr, AZƏRTAC

Bu il Vətən müharibəsində möhtəşəm Zəfərimizin ikinci ildönümünü qeyd edirik. İkinci Qarabağ müharibəsinin bitməsindən sonra Prezident İlham Əliyev imzaladığı Sərəncamla l Şuşanın erməni işğalından azad edildiyi günün - 8 noyabr tarixinin Qələbə münasibətilə hər il Zəfər Günü kimi qeyd olunacağını elan etdi. Şuşa həmişə ölkəmizin tarix və mədəniyyətinin rəmzi olub. Müzəffər Ali Baş Komandanın rəhbərliyi ilə 44 günlük Vətən müharibəsində məhz Şuşanın işğaldan azad edilməsindən sonra Ermənistanın kapitulyasiya aktına imza atmağa məcbur oldu. Müharibənin şanlı Qələbəmiz, torpaqlarımızın düşmən işğalından azad olunması ilə başa çatmasından sonra isə Şuşa həm də bütün dünyada hərbi gücümüzün, qüdrətimizin, Azərbaycan əsgərinin cəsarətinin, igidliyinin, qəhrəmanlığının, Azərbaycanın haqq səsinin rəmzinə çevrildi. Torpaqlarımızın işğal altında olduğu 30 illik dövr ərzində hər bayram ən böyük arzusunun növbəti bayramı Qarabağda qeyd etmək istəyi olan xalqımız üçün Zəfər Günü üçün bundan daha möhtəşəm tarix ola bilməzdi.

AZƏRTAC xəbər verir ki, bu fikirləri Milli Məclisin Müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov söyləyib.

Komitə sədri bildirib ki, Azərbaycan xalqı 30 il idi Qələbəni, torpaqlarımızı düşmən işğalından azad etmək üçün Ali Baş Komandanın əmrini gözləyirdi. Bu müddət ərzində həm Ulu Öndərin hakimiyyəti illərində, həm də Prezident İlham Əliyevin rəhbərliyi dövründə atılmış hər bir addım, qəbul olunmuş hər bir qərar Azərbaycan torpaqlarının düşmən işğalından azad olunmasına xidmət edib. Vətən müharibəsində qazanılmış Zəfər mükəmməl ordu quruculuğu siyasətinin və iqtisadi inkişafın nəticəsidir. Ordunu dövlətin dayağı, xalqın güvən yeri, qürur mənbəyi adlandıran Ulu Öndər Azərbaycan Ordusunun yaradıcısı olmuş, Silahlı Qüvvələrimizi dövlət müstəqilliyinin dəyərli reallıqlarından birinə çevirmişdir. Azərbaycan Ordusunun inkişafı, müasirləşdirilməsi, döyüş qabiliyyətinin artırılması Prezident İlham Əliyevin rəhbərliyi illərində də uğurla davam etdirilmiş, ordu quruculuğu dövlət quruculuğunun əsas istiqamətlərindən birinə çevrilmişdi. Şübhəsiz ki, Ordu quruculuğu sahəsindəki bu əzmkar fəaliyyət 44 günlük Vətən müharibəsindəki Qələbəmizin təməlini təşkil etdi. Danılmaz faktdır ki, bütün müharibələrdə son sözü güclü ordu və onun Ali Baş Komandanı deyir. İkinci Qarabağ müharibəsində də son sözü şanlı Azərbaycan Ordusu və onun Müzəffər Ali Baş Komandanı Ermənistanı kapitulyasiya aktına imza atmağa məcbur etməklə söylədi.

“Təcavüzkar siyasətinin, Azərbaycan torpaqlarını işğal altında saxlamasının nəticələri, əlbəttə, Ermənistan üçün ağır olmuşdur, 30 il ərzində Ermənistan regional layihələrdən təcrid olunmuş, iqtisadi cəhətdən heç bir inkişafa nail olmamışdır. Ermənistandan fərqli olaraq, haqlı mövqeyi ilə, 30 il ərzində səbirlə münaqişənin sülh yolu ilə həll edilməsinə yönələn cəhdləri ilə və ən əsası uğurlu, müdrik xarici siyasəti ilə regionda demək olar bütün transmilli layihələrin əsas iştirakçısı olan Azərbaycan isə həm iqtisadi cəhətdən inkişaf etmiş, həm də regionun mənzərəsini müsbət mənada tamamilə dəyişmişdir”, - deyə Z.Əsgərov qeyd edib.

Bildirilib ki, çox təəssüf, səbirlə gözlənilən bu 30 il nəinki işğal olunmuş torpaqlarımızın Azərbaycana qaytarılması ilə nəticələnmədi, əksinə cəzasızlıq düşmənin daha da azğınlaşmasına, sərhəddə atəşkəsin tez-tez pozulması, təxribatlara əl atmasına, hətta yeni ərazi iddialarına düşməsinə gətirib çıxardı. Münaqişənin həlli üçün beynəlxalq təşkilatların, beynəlxalq hüququn yetərsiz olduğu isə artıq hər keçən il daha da aydın olurdu. Belə olan halda həm düşmənin təxribatlarına, azğınlaşmış ərazi iddialarına layiqincə cavab vermək, həm ərazi bütövlüyümüzü, suverenliyimizi, beynəlxalq hüququ, bərpa etmək, eləcə də minlərlə məcburi köçkünümüzün öz doğma torpaqlarında yaşamaq hüququnu bərpa etmək üçün bizim yalnız bir seçimimiz qalmışdı: düşmənin başını “Dəmir yumruq”la əzmək.

Komitə sədri diqqətə çatdırıb ki, 44 gün davam edən Vətən müharibəsinin hər günü Ordumuz tərəfindən tarix yazıldı. Fizuli əməliyyatı, Zəngilan döyüşləri, Cəbrayılın, Qubadlının işğaldan azad edilməsi uğrunda aparılan döyülər, Şuşa əməliyyatı, bütün bu döyüşlər mürəkkəb xarakterli, düşmənin müdafiə istehkamlarını yarmağı tələb edən, xüsusi peşəkarlıq və cəsarət tələb edən əməliyyatlar idi. Ordumuz yüksək peşəkarlıq və fədakarlıqla, vətən sevgisi ilə, xalqın dəstəyini hiss edərək və ən əsası, müharibədə haqlı tərəf olmağın verdiyi güc ilə bu vəzifələrin öhdəsindən ən yüksək səviyyədə gəlmişdir. ABŞ Hərbi Akademiyası və Pentaqonun rəsmiləri başda olmaqla hərbi analitiklər Vətən müharibəsində Azərbaycan Ordusu tərəfindən istifadə olunan döyüş taktikasını dünya hərb tarixində yenilik hesab edir və onun öyrənilməsinin vacibliyini vurğulayır. Budur Azərbaycanın Şanlı Ordusu! Bu qüdrətli ordunu təşkil edən isə, əlbəttə, vətənpərvər Azərbaycan əsgərləridir. Müzəffər Ali Baş Komandanın dəfələrlə fəxrlə vurğuladığı kimi, İkinci Qarabağ müharibəsi zamanı Azərbaycan Ordusunda bir nəfər də fərari olmayıb. Əksinə on minlərlə vətəndaşımız orduya könüllü kimi yazılmışdır.

“Təəssüf ki, istənilən müharibə itkisiz olmur, Vətən müharibəsində Azərbaycanın 2907 hərbçisi şəhid olmuş, xeyli əsgərimiz yaralanmışdır. Dövlətimiz və xalqımız şəhidlərimizi hər zaman dərin ehtiramla yad edəcək. Anım Gününün qeyd olunması, Qələbə münasibətilə medal və ordenlərin təsis olunması, Prezident İlham Əliyevin və Birinci vitse-prezident Mehriban xanım Əliyevanın mənəvi diqqəti və qayğısı Vətən müharibəsi iştirakçılarına olan ali diqqətin təcəssümüdür.

Müharibədə Zəfərimizi şərtləndirən ən mühüm amillərdən biri də həmrəyliyimiz olmuşdur. Xalq-iqtidar-ordu həmrəyliyi, ölkəmizin bütün vətəndaşlarının ön və arxa cəbhədə sarsılmaz birliyi, təxribatlar zamanı insanların öz evlərini tərk etməməsi, orduya kütləvi yardım kampaniyalarının keçirilməsi, dövlətimizin başçısının xalqa müraciətlərinin hər dəfə daha böyük coşqu və sevinclə qarşılanması müharibə günlərinin səciyyəvi xüsusiyyətləri idi. Burada Prezident İlham Əliyevin çıxışlarını xüsusi qeyd etmək istəyirəm. Müharibə dövründə Azərbaycan Prezidentinin çıxışları münaqişə ilə bağlı əsl həqiqətləri beynəlxalq ictimaiyyətə çatdırmaq nə qədər qətiyyətli, iradəli, konkret və sərt idisə, xalqa müraciətlər bir o qədər ürəkdən səslənən, xalqın hisslərini bölüşən və emosional idi. 44 günlük Vətən müharibəsi dövründə Prezident İlham Əliyev əsl Lider kimi hərbi komandanlıqdan tutmuş informasiya müharibəsinə kimi bütün cəbhələrdə ən öndə vuruşmuşdur. Dövlətimizin başçısının “Mən xalqımdan heç nəyi gizlətmirəm”, “Nəyi, necə, nə vaxt etmək lazımdır, bunu mən bilirəm” mesajları verərək xalqda ruh yüksəkliyi, özünə güvən formalaşdırması, müharibə dövründə qarşılaşdığı təzyiqlərə təmkinlə, eyni zamanda, kəskin və cəsarətli cavablar verməsi, sonda düşmənin kapitulyasiya aktı imzalamağa məcbur etməsi və nəticədə əldə olunan Qarabağ Zəfəri Azərbaycanda xalq-iqtidar birliyini ən yüksək zirvəyə qaldırmışdır”, - deyə parlamentin komitə sədri vurğulayıb.

Vurğulanıb ki, Zəfərin ildönümünü qeyd edərkən mütləq qardaş Türkiyənin dəstəyini də xüsusi qeyd etməliyik. Türkiyə Prezidenti Rəcəb Tayyib Ərdoğanın müharibə başlayan andan “Azərbaycan tək deyil, Türkiyə onun yanındadır” deməsi bizə ən böyük mənəvi güc olmuşdur. Biz bu dəstəyi, dostluğu ən yüksək səviyyədə qiymətləndirərək tarixi Şuşa Bəyannaməsini imzalamış, Türkiyə-Azərbaycan münasibətlərini müttəfiqlik zirvəsinə ucaltmışıq. Zəfər paradında Türkiyə Prezidenti Rəcəb Tayyib Ərdoğanın Müzəffər Ali Baş Komandanımızın yanında olması, paradda Azərbaycan və türk əsgərlərinin çiyin-çiyinə addımlaması xalqlarımızın tarixinə yazılmış unudulmaz hadisədir.

Vətən müharibəsinin bitməsi ilə artıq iki ildir ki, Azərbaycanın inkişaf tarixində yeni dövr başlayıb. Bu dövr “Böyük Qayıdış”, bərpa-quruculuq, azad edilmiş şəhər və kəndlərimizin yenidən qurulması, məcburi köçkünlərimizin öz doğma torpaqlarına qaytarılması dövrüdür. Cəmi iki il ərzində işğaldan azad edilmiş ərazilərimizdə iki hava limanının istifadəyə verilməsi, yeni magistral yolların inşası, onlarla sosial-infrastruktur obyektlərinin açılması, Qarabağ və Şərqi Zəngəzur iqtisadi rayonlarının yaradılması təsdiq edir ki, ölkəmiz “Böyük Qayıdış” missiyasını da uğurla tamamlayacaq.

“Sonda qeyd edim ki, İkinci Qarabağ müharibəsində Ermənistan yalnız cəbhədə məğlub edilməyib, Ermənistan həm də mənəvi məğlubiyyətə uğradıldı, biz sübut etdik ki, Ermənistan bu münaqişədə haqsız tərəfdir, təcavüzkar tərəfdir. Kapitulyasiya aktına imza atmaqla Ermənistan cəbhədəki məğlubiyyəti çoxdan qəbul edib, indi isə Ermənistan üçün yeganə çıxış yolu, ümumilikdə münaqişədə haqsız tərəf olmasını qəbul etmək, işğalçı siyasətindən əl çəkmək və Azərbaycanın ərazi bütövlüyünü tanımaqdır. Son Soçi görüşündə Prezident İlham Əliyev bir daha qətiyyətlə vurğuladı ki, Qarabağ münaqişəsi artıq tarixdə qalıb, münaqişə iki il bundan əvvəl həll edilib. Bu baxımdan praktiki olaraq Qarabağ münaqişəsi ilə bağlı müzakirə edilməli məsələ yoxdur. Azərbaycanın Qarabağ bölgəsində yaşayan erməni əhalisi ilə bağlı da Ermənistanla müzakirə ediləsi məsələ yoxdur. Prezident İlham Əliyev dəfələrlə qeyd edib ki, bu bizim daxili məsələmizdir, bu məsələ ölkəmizin Konstitusiyasına uyğun və könüllülük prinsipi əsasında həll ediləcək. Bundan sonra danışıqlar yalnız Azərbaycan-Ermənistan münasibətlərinin normallaşması, sərhədlərin delimitasiyası, sülh müqaviləsinin bağlanması ilə bağlı ola bilər. Bu istiqamətdə də Azərbaycan həmişə sülhün, sabitliyin, təhlükəsizliyin və Cənubi Qafqazın davamlı inkişafının təmin edilməsi naminə üzərinə götürdüyü öhdəliklərlə hər zaman sadiqdir”, - deyə Ziyafət Əsgərov fikirlərini yekunlaşdırıb.