TƏBİİ FƏLAKƏT RAYONLARINDA PREZİDENT İLHAM ƏLİYEVİN GÖSTƏRİŞLƏRİNƏ UYĞUN OLARAQ KOMPLEKS TƏDBİRLƏR DAVAM ETDİRİLİR
Sabirabad, 21 iyun (AZƏRTAC). Kürətrafı ərazilərdə daşqın təhlükəsi aradan qalxsa da, çayda bol suyun dənizə təhlükəsiz ötürülməsi istiqamətində fasiləsiz tədbirlər görülür.
Təbii fəlakət rayonlarında Prezident İlham Əliyevin göstərişlərinə uyğun olaraq kompleks tədbirlər davam etdirilir.
Kürün deltasında suyun lildən təmizlənməsi və çayın dibinin dərinləşdirilməsi işləri davam etdirilir. Təmizlənən yerlərdə dərinlik 5-6 metrə yaxındır. Görülən işlər nəticəsində Kür çayının suyunun dənizə axması xeyli sürətlənmiş, çayda suyun səviyyəsi xeyli aşağı düşmüşdür. Kürün qollarının dərinləşdirilməsi istiqamətində də işlər davam etdirilir. Hazırda Kürün deltasında suyu lildən təmizləmək üçün 8 gəmi işləyir və əlavə olaraq daha bir gəmi gətiriləcəkdir.
Təbii fəlakət zonasında isə böhran vəziyyəti aradan qaldırılmışdır. Əhali tədricən öz evlərinə qayıdır. Dəyən zərərin aradan qaldırılması və əhalinin baş verə biləcək təhlükələrdən qorunması üçün yaradılan alt komissiyalar müvafiq tədbirlər həyata keçirir. Su basan yerlərdə əhalinin əkin sahələrinə və mal-qarasına dəyən ziyanın miqdarı müəyyənləşdirilir. Bu arada təbii fəlakətdən zərər çəkən rayonlarda fəaliyyət göstərən sahibkarlara dəstək məqsədi ilə müvəkkil kredit təşkilatları Sabirabad və ətraf rayonlarda fəaliyyət göstərən 34 sahibkarlıq subyektinə 2 milyon manatadək güzəştli kredit vermişdir. Bu kreditlər hesabına 94 yeni iş yerinin yaradılması nəzərdə tutulur.
Bölmənin digər xəbərləri
